हिमाल प्रेस 
काठमाडौँ- नेपाली कांग्रेसका केन्द्रीय सदस्य एवं शिक्षा विभाग प्रमुख नैनसिंह महरले शिक्षक र शिक्षा क्षेत्रका समस्या समाधानमा कांग्रेस गम्भीर रहेको बताएका छन्। नेपाल शिक्षक संघ ललितपुरद्वारा बुधबार आयोजित २४औँ प्रतिनिधिसभा स्वागत तथा सम्मान कार्यक्रमलाई प्रमुख अतिथिका रूपमा सम्बोधन गर्दै नेता महरले उक्त कुरा बताएका हुन्। ‘शिक्षकलाई निजामती सरहको सेवा सुविधा दिइनुपर्छ। भौतिक पूर्वाधारमा ध्यान दिने, तालिम र परीक्षणमा ध्यान दिने कुरामा राज्य गम्भीर बन्नुपर्छ। गुणस्तर अभिवृद्धिका लागि शिक्षामा २० प्रतिशत बजेट छुट्याइनुपर्छ’, महरले भने।
महरले संसदमा थन्किएर बसेको विद्यालय शिक्षा ऐनलाई यही हिउँदे अधिवेशनबाट पारित गर्नसमेत सरकारसँग माग गरेका छन्। विद्यालय ऐनमा आएका विषयमा सरोकारवालासँग छलफल गरेर उनीहरूको रायलाई पनि स्थान दिएर विधेयक पारित गर्नुपर्ने उनको सुझाव छ।
अहिलेसम्म अधिकारको मात्र कुरा गरिएकोमा त्यो सँगसँगै कर्तव्यनिष्ठ हुनुपर्नेमा उनको जोड छ। ‘२००७ सालदेखि आजसम्म अधिकारका बारेमा ठूला बहस भए। आन्दोलन भए। हामीले संविधान बनायौँ। पार्टीका घोषणापत्र बनायौं। थुप्रै अधिकार स्थापित भए। अधिकारसँगै कर्तव्यको पालनाले मात्र प्रजातन्त्र बलियो हुन्छ भन्ने कुरालाई ध्यान दिएर कर्तव्य पालनातर्फ लागेनौं,’ उनले भने।
यस्ताखाले कमजोरीका कारण प्रजातन्त्रले हामीलाई के दियो भन्ने प्रश्न उठ्ने गरेको उनको टिप्पणी छ। प्रधानमन्त्रीदेखि श्रमिकसम्म कर्तव्य पालनामा चुक्दा समस्या देखिएको महरले बताए। अधिकार र कर्तव्यको पालनाले मात्र लोकतन्त्र बलियो पार्दै जनताका सपना साकार पार्न सकिनेमा उनले जोड दिएका छन्।
‘२००७ सालदेखि नेताहरूले राजनीतिक नेतृत्व गर्नु भयो। तर, मुलुकलाई पूर्णरुपमा गतिशील बनाउन ऐन, कानुन दिन सक्नु भएन। अहिलेको ज्वलन्त समस्या यही हो। अब राजनीतिक दलहरू पुरानै शैलीबाट चल्नु हुँदैन। समय सापेक्ष बन्दै परिणाममुखी काम गर्नुपर्छ’, उनले भने।
उनले राजनीतिक दलका घोषणापत्र निकै लोभदाग्दा बन्ने गरेका तर कार्यान्वयन पक्ष निकै फितलो रहेको बताएका छन्। घोषणापत्रमा लेखिएका कुरा कति कार्यान्वयन भए भन्नेमा पनि गम्भीर समीक्षा आवश्यक रहेको महरले औंल्याएका छन्। सबल लोकतान्त्रिक देश निर्माणमा सबै जुट्नुपर्ने महरको भनाइ छ। ‘सबल लोकतान्त्रिक देश भनेको त्यस्तो देश हो, जसले नागरिकका अधिकार र स्वतन्त्रता सुनिश्चित गर्छ। विधिको शासन पालना गर्छ। जवाफदेही सरकारको व्यवस्था गर्दछ। जनताको सहभागिता बढाउँछ’, उनले भने।
ललितपुर कांग्रेसका सभापति जितेन्द्रकुमार श्रेष्ठले एकले अर्कालाई स्वीकार गर्ने वातावरण बनेमा संगठन सुदृढ हुने बताए। उनले भने, ‘हारलाई स्वीकार गरे मात्र प्रतिस्पर्धामा कुनै कुनै दिन सफल हुन सकिन्छ।’ एउटा साथीले अर्का साथीलाई स्वीकार गरेमा सबैको जित हुन सक्ने उनको भनाइ छ। नेपाल शिक्षक महासंघका प्रवक्ता एवम् उपमहासचिव नारायण तिमिल्सिनाले शिक्षक महासंघले शिक्षा विधेयक संसद्को चालु अधिवेशनबाट पारित गराएरै छाड्ने प्रतिबद्धता जनाए।
उनले भने, ‘हामीले शिक्षकका माग र मुद्दा समेटिने गरी विधेयक पारित हुनुपर्छ भनेर राजनीतिक दलका नेता र सांसदहरूसँग पक्षीकरण गरिसकेका छौँ।’ यसैगरी उनले महासंघले केही दिनअघि पूर्णता पाएकोले अब शिक्षकहरू एकजुट भएर आन्दोलनमा जाने बताए।
नेपाल शिक्षक संघ ललितपुरका सभापति सुरेश घिमिरेले जिल्लामा शिक्षक संघको संगठन बलियो बनाउन सबै एकजुट भएर लाग्नुपर्ने बताए। उनले पनि संसद्को चालु अधिवेशनबाट शिक्षा विधेयक पारित गराउन नेतृत्वको ध्यानाकर्षण गराएका थिए। कार्यक्रममा हालै राष्ट्रिय खेलकुद परिषद्को सदस्यमा चयन भएकी रञ्जना प्रधानलाई विशेष सम्मान गरिएको थियो।
संघले विभिन्न पदमा बढुवा भएका शिक्षकहरूलाई सम्मान गरेको थियो। सम्मानित हुने शिक्षकहरूमा निर्मला सिलवाल, गोपालकुमार पाण्डे, इमत्याज अहमद खान, विन्दा श्रेष्ठ, रमेशप्रसाद आचार्य, दिनेशराज घिमिरे रहेका छन्। यसैगरी शिक्षकहरू कृष्णभगत महर्जन, प्रकाश गिरी, रवीन्द्रप्रसाद चौधरी, महेश्वर केसी, बुद्धरत्न तण्डुकार, सन्तोष लुइँटेल, दीपेन्द्रसिंह राउत, कर्णबहादुर बोहरालाई सम्मानित भए। सम्मानित हुने अन्य शिक्षकहरूमा मञ्जु लम्साल, गौरी पौडेल, दीपकसिंह बानियाँ, अनन्त घिमिरे, सरिता श्रेष्ठ कायस्थ लगायत छन्। कार्यक्रममा संघका जिल्ला सचिव तुलसी न्यौपानेले संघले गरेका गतिविधिबारे जानकारी गराएका थिए।
कार्यक्रममा कोन्जोस्योम गाउँपालिकाका उपप्रमुख एवम् कांग्रेस ललितपुरका सचिव राजन घिमिरे, नेपाल शिक्षक संघ ललितपुर महानगर सभापति उद्धवप्रसाद तिमिल्सिना, संघका काठमाडौँ अध्यक्ष मेघबहादुर बन्जारा, नेपाली कांग्रेस महालक्ष्मी नगरका सभापति दिवाकर सिलवाल, शैक्षिक अभियन्ता रविन शर्मा गायतले सम्बोधन गरेका थिए।
