हिमाल प्रेस 
हत्या आराेपमा पक्राउ परेका अभियुक्तहरू।
काठमाडौँ- प्रेमिकाका हत्या गरेको आरोपमा प्रहरीले धनुषाबाट प्रेमीसहित तीन जनालाई नियन्त्रणमा लिएको छ।
धनुषाको जनकनन्दनी गाउँपालिका–५ उधा टोलकी रेखा कुमारी मण्डलको हत्यामा संलग्न रहेको आरोपमा प्रहरीले स्थानीय रामललित मण्डलसहित तीन जनालाई पक्राउ गरेको हो।
पक्राउ पर्नेमा रेखाको प्रेमी जनकनन्दनी गाउँपालिका–३ बस्ने २२ वर्षीय रामललित मण्डल खत्वे तथा हत्यामा सहयोगी बनेका धनुषा सहिदनगर नगरपालिका–८ का ज्ञानेन्द्र दास र जनकनन्दनी– ५ का रमेशकुमार मण्डल रहेको प्रहरीले जनाएको छ।
ज्ञानेन्द्र र रमेशले रेखालाई घटनास्थलसम्म सहयोग गरेको र रामललितले ब्लेडले घाँटी रेटी हत्या गरेको अनुसन्धानबाट खुलेको जिल्ला प्रहरी कार्यालय धनुषाका प्रवक्ता डीएसपी बरूणकुमार सिंहले जानकारी दिए।
रेखा र रामललित ५÷६ वर्षदेखि प्रेम सम्बन्धमा रहेको प्रहरी अनुसन्धानबाट खुलेको छ। दुवै जनाबीचको सम्बन्ध परिवारले स्वीकार नगरेपछि घरबाट भागेर रेखाले विवाहका लागि रामललितलाई दबाब दिइरहेकी थिइन्।
रामललितले भने सेनामा आवेदन दिएको र जागिर भइसकेपछि मात्र विवाह गर्ने बताउँदै आएका थिए। यही विषयमा दुवै जनाबीच विवाद हुँदा उनले रेखाको हत्या गरेको अनुसन्धानबाट खुलेको डीएसपी सिंहले जानकारी दिए।
जनकनन्दनी गाउँपालिका र कमला नगरपालिकाको बीच सिमानास्थित आमा खोलामा रेखाको शव प्लास्टिकको बोरामा बरामद भएको थियो।
अनुहारको बायाँतर्फ गालामा चोट लागेको र घाँटी काटिएको अवस्थामा शब बरामद भएको प्रहरीले जनाएको छ। रेखालाई घटनास्थलसम्म ल्याउन ज्ञानेन्द्र र रमेशले सहयोग गरेको अनुसन्धानबाट खुलेको छ।
रामललितले भने रेखाको अनुहारमा ढुंगा प्रहार गरी बेहोस बनाई घाँटी रेटेर हत्या गरेको अनुसन्धानबाट खुलेको प्रहरीले जनाएको छ।
पक्राउ परेका तीनै जनामाथि कर्तव्य ज्यानसम्बन्धी मुद्दा दर्ता भएर आवश्यक अनुसन्धान भइरहेको प्रहरीले जनाएको छ।
