हिमाल प्रेस 
इटहरी- इटहरीमा टिपर र म्याजिक भ्यानको ठक्करबाट श्रीमानश्रीमतीको मृत्यु भएको पुष्टि भएको छ। प्रहरीको प्रारम्भिक अनुसन्धानअनुसार सुरुमा टिपरले ठक्कर दिएको र लगत्तै म्याजिक भ्यानले ठक्कर दिएर मृत्यु भएको खुलेको हो।
आज (आइतबार) दिउँसो १२ बजेतिर पकलीबाट इटहरीतर्फ आउँदै गरेको को ३६ प ५६३७ नम्बरको बुलेट मोटरसाइकलमा सवार एक दम्पतीलाई पश्चिमतर्फ गइरहेको को १ क ३३८८ टिपरले ठक्कर दिएको थियो।
सुरुमा टिपरको ठक्करबाट दम्पती लडेका थिए। त्यसैबेला पश्चिमतर्फ नै गइरहेको प्रदेश १–०२–००१ ज ३८११ नम्बरको म्याजिक भ्यानले ठक्कर दिएको थियो।
दुर्घटनामा संखुवासभा धर्मदेवी नगरपालिकाका ३२ वर्षीय युवराज गुरुङ र ३२ वर्षीया टीका गुरुङको मृत्यु भएको छ। उनीहरू श्रीमानश्रीमती रहेको जिल्ला प्रहरी कार्यालय सुनसरीले जनाएको छ।
घटनामा गम्भीर घाइते भएका उनीहरूलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठानमा उपचारका लागि लगिएको थियो।अस्पताल पुर्याउनसाथ चिकित्सकले मृत घोषित गरेका थिए।
प्रहरीले टिपर चालक मोरङको सुन्दरहरैँचा ३ गछियाका ३५ वर्षीय सागर मग्राती र म्याजिक भ्यान चालक इटहरी १२ खनारका ३९ वर्षीय श्याम बिकलाई नियन्त्रणमा लिएर घटनाबारे थप अनुसन्धान गरिरहेको जनाएको छ।
