पोखराको एक होटलमा जुवातास खेलिरहेका ६ जना पक्राउ

पोखरा- पोखराको एक होटलमा जुवातास खेलिरहेको अवस्थामा ६ जनालाई कास्की प्रहरीले नगदसहित पक्राउ गरेको हो। पोखरा १७, ड्यामसाइडस्थित होटल स्याण्डी ब्लुममा जुवातास खेलिरहेको भन्ने सूचना आधारमा वडा प्रहरी कार्यालय बैदामको टोलीले उनीहरूलाई नगद १ लाख ६१ हजारसहित नियन्त्रणमा लिएको हो।

पक्राउ पर्नेमा स्याङ्जाको गल्याङ ४ स्थायी घर भइ हाल उक्त होटलको रेखदेख गर्ने ३८ वर्षीय नवीन थापा, स्याङ्जा पुतलीबजार ७ घर भइ हाल पोखरा १० बस्ने ४० वर्षीय भेषबहादुर गुरुङ, पोखरा १२ का ४३ वर्षीय शंकर थापा, पोखरा १७ की ५३ वर्षीया सावित्री गुरुङ, कास्कीको माछापुच्छ्रे २ घर भइ हाल पोखरा ७ बस्ने ३९ वर्षीया दुर्गा गुरुङ र पोखरा १७ निवासी ४९ वर्षीया आइती गुरुङ हुन्।

उनीहरूलाई जिल्ला प्रशासन कार्यालय कास्कीबाट जुवा सम्बन्धी मुद्दामा ७ दिनको म्याद थप गरी अनुसन्धान भइरहेको प्रहरीले जनायो।