हिमाल प्रेस 
विद्यार्थी। फाइल तस्बिर ।
सुनसरी- बराहक्षेत्र नगरपालिका–६ चक्रघट्टीस्थित महेन्द्र माध्यमिक सामुदायिक विद्यालयमा अंग्रेजी माध्यममा पढाइ सुरु गरेपछि विद्यार्थीको संख्या वृद्धि भएको छ। अभिभावकको मागसँगै विद्यालयले अंग्रेजी माध्यमबाट पढाइ सुरु गरेपछि विद्यार्थी संख्या वृद्धि भएको विद्यालयका प्रधानाध्यापक चण्डीराज पोख्रेलले बताए।
उनले गत वर्षदेखि नगरपालिकामै पहिलोपटक आधारभूत तह शिशु कक्षादेखि कक्षा १२ सम्म अंग्रेजी माध्यमबाट पढाइ सुरु गरिएको जानकारी दिए। उनले भने,‘अभिभावकको सहयोग र सल्लाहमा विद्यालयमा अंग्रेजी माध्यमको पढाइ सुरु गरिएको हो। अंग्रेजी पढाइ सुरु भएसँगै विद्यालयमा विद्यार्थीको संख्या वृद्धि भएको छ।’
विद्यार्थीको संख्या धेरै भएपछि कक्षाकोठा व्यवस्थापनका लागि पुरानो भवन मर्मत थालिएको उनले बताए। पानी परेको बेला चुहिएर पढाइमा समस्या हुने भएकाले आवश्यक सहयोगका लागि उनले सरोकारवालासँग आग्रह गरेका छन्। प्रधानाध्यापक पोख्रेलका अनुसार विद्यालयमा हाल आठ सय ५० विद्यार्थी अध्ययनरत छन्। एक वर्षमै दुई सय भन्दा बढी विद्यार्थी संख्या थपिएको विद्यालयले जनाएको छ।
विद्यार्थीको चाप बढेपछि आठ शिक्षक थप गरी ३० शिक्षकबाट पठनपाठन सञ्चालन गरिरहेको प्रधानाध्यापक पोख्रेलले बताए। विद्यालयमा बिहान १० देखि ४ बजेसम्म अंग्रेजी माध्यम र १०:३० देखि ४:३० बजेसम्म नेपाली माध्यमको पढाइलाई दुई भागमा विभाजन गरिएको छ।
अंग्रेजी माध्यममा पढाइ सुरु भएसँगै महेन्द्र माविमा कार्यरत शिक्षकलेसमेत आफ्ना छोराछोरीलाई सोही विद्यालयमा भर्ना गरेको शिक्षक प्रवीण खड्काले बताए। उनले भने,‘अभिभावकले अंग्रेजी माध्यममा पढाइ सुरु गर्न आग्रह गरेपछि छुट्टै आठ शिक्षक थप गरी अंग्रेजी माध्यममा पढाइ सुरु गरिएको हो।’
विद्यालयको आयस्रोत कमी भएकाले अंग्रेजी माध्यममा पढाउने शिक्षकका लागि विद्यालयले अभिभावककै राजीखुसीमा प्रति विद्यार्थी मासिक न्यूनतम शुल्क लिने गरेको विद्यालयले जनाएको छ। २०१३ सालमा स्थापना भएको महेन्द्र माविले २०५७ सालदेखि कक्षा १२ सम्म सञ्चालन गर्दै आएको छ।
