हिमाल प्रेस 
काठमाडौँ- जनता समाजवादी पार्टी (जसपा) नेपालले महाधिवेशन प्रतिनिधि निर्वाचन कार्यलाई तिव्रता दिएको छ।
पार्टीका प्रचार विभाग प्रमुख पूर्ण बस्नेतले पार्टीका विभिन्न तहगत समिति, जनवर्गीय संगठन, पेसागत तथा सामाजिक संघ-संगठनबाट प्रतिनिधि निर्वाचन कार्य भइरहेको जानकारी दिएका छन्।
प्रमुख बस्नेतले भने, ‘प्रतिनिधि निर्वाचनका लागि केन्द्रीय निर्वाचन तदर्थ समितिले प्रदेश, जिल्ला, निर्वाचन क्षेत्र तथा जनवर्गीय संघ, संगठनहरुमा निर्वाचन अधिकृत खटाएको छ। पार्टी सदस्यताको आधार र समितिगत प्रतिनिधित्व गरेर करिब एक हजार महाधिवेशन प्रतिनिधि निर्वाचित हुनेछन्।’
बस्नेतका अनुसार महाधिवेशनको कार्यतालिका अनुसार जेठ १५ गते संगठन विभागले निर्वाचित महाधिवेशन प्रतिनिधिहरुको अभिलेखीकरण गरी केन्द्रीय निर्वाचन तदर्थ समितिले अन्तिम नामावली प्रकाशन गर्नेछ।
प्रकाशित: १२ जेठ २०८१ ९:३३
प्रतिक्रिया
