हिमाल प्रेस 
फुङ्लिङ- कन्चनजंघा क्षेत्रमा पछिल्लो समयमा घुम्न आउने पर्यटकको संख्या बढ्दै गएको छ। लामो समय सुनसानजस्तै रहेको कन्चनजंघा क्षेत्रमा तीन महिनामा छ सय ५० बाह्य पर्यटकले भ्रमण गरेका छन्।
कन्चनजंघा क्षेत्रमा दुई याममा पर्यटक भम्रण गर्ने गर्दछन्। कन्चनजंघा संरक्षण क्षेत्र व्यवस्थापन परिषद्को कार्यालयका सूचना अधिकारी दोभान लिम्बूले चालु आर्थिक वर्षको पहिलो याम असोज, कात्तिक र मंसिरसम्म कन्चनजंघा हिमालको आधार शिविरको छ सय ५० जना बाह्य पर्यटकले अवलोकन गरेको बताए।
त्यत्तिकै संख्यामा आन्तरिक पर्यटकले समेत कन्चनजंघा क्षेत्रको अवलोकन गरेको भनिएतापनि आन्तरिक पर्यटकको तथ्यांक भने अहिलेसम्म राख्ने व्यवस्था नभएको परिषद् कार्यालयले जनाएको छ।
यस क्षेत्रमा पर्यटकको आगमनले होटल व्यवसायी उत्साहित भएका छन्। दोस्रो याम चैत, वैशाख र जेठ महिनामा हुने पर्यटन व्यवसायीको भनाइ छ। अहिले दास्रो याम सुरु हुने समय भएको छ।
गत वर्ष चार सय ३९ बाह्य पर्यटकले अवलोकन गरेका थिए। गत वर्षका तुलनामा चालु आवमा दुई सय ११ बाह्य पर्यटक वृद्धि भएको परिषद्को तथ्यांकले जनाएको छ।
विस्तारै पर्यटकको आगमनसँगै पर्यटन व्यवसाय लयमा फर्कन थालेका छन्। कोभिड-१९ का कारणले लामो समय सुनसानजस्तै रहेको कन्चनजंघा हिमशृंखला क्षेत्र विस्तारै लयमा फर्किन थालेको परिषद्का कार्यालय सचिव मनकुमार लिम्बूले बताए।
कन्चनजंघा क्षेत्रमा बसोबास गर्ने समुदायको मुख्य आम्दानीको स्रोत पर्यटन हो। विस्तारै पर्यटकको आगमनले पर्यटन व्यवसायी तथा होटल व्यवसायी उत्साहित भएका छन्। कन्चनजंघा आउने पर्यटक लक्षित गरेर कन्चनजंघा हिमाल जाने पदमार्गमा सानो-ठूलो लगानीको ५२ होटल सञ्चालनमा रहेको कन्चनजंघा संरक्षण क्षेत्र व्यवस्थापन परिषद्को तथ्यांक छ।
फक्ताङलुङ गाउँपालिका-६ ग्याप्लामा सात करोड रुपैयाँभन्दा माथिको लगानीमा बनेको सिंगी नामजोङ होटल सञ्चलनमा छ। समुद्र सतहबाट तीन हजार पाँच सय मिटरदेखि चार हजार पाँच सय मिटर उचाइमा एक करोडभन्दा बढी लगानीमा बनेका चारवटा होटल सञ्चालनमा रहेको कन्चनजंघा संरक्षण क्षेत्र व्यवस्थापन परिषद् कार्यालयका कार्यक्रम सहायक संयोजक जितेन चेम्जोङले बताए।
अन्य ८० लाख रुपैयाँदेखि माथिका लगानीमा होटल सञ्चालनमा रहेको चेम्जोङको भनाइ छ। पहिल्लो समयमा पर्यटकको आगमनले पर्यटन व्यवसायी तथा होटल सञ्चालक उत्साहित भएको घुन्साका होटल व्यवसायी पेमा शेर्पाले बताए।
विसं २०७६/०७७ मा तीन सय ८६ पुरुष र एक सय ८६ महिला विदेशी पर्यटक कन्चनजंघा हिमालमा आएको परिषद्को तथ्यांकमा उल्लेख छ। सार्क राष्ट्रबाट २५ पुरुष र चार महिला पर्यटक कन्चनजंघा हिमालमा आएका हुन्।
कन्चनजंघा हिमालमा आउने विदेशी पर्यटकको तथ्यांकलाई २१ वर्ष पछाडि फर्केर हेर्दा विसं २०५६ मा पुग्न सकिन्छ। विसं २०५६ मा सात सय ९९ विदेशी पर्यटक कन्चनजंघा घुमघाम गर्न आएको तथ्यांक छ।
विसं २०५७ मा आठ सय ७३ विदेशी पर्यटक आएका छन् भने २०५७ देखि २०७७ सम्म ११ हजार एक सय ९७ विदेशी पर्यटक कन्चनजंघा हिमाल अवलोकन गर्न आएको परिषद्को तथ्यांकले देखाएको छ।
कन्चनजंघा हिमालको आधार शिविर पुग्नका लागि दुईवटा पदमार्ग प्रयोग हुँदै आएको छ। पाँचथरको गणेशचोक हुँदै ताप्लेजुङको सिरिजंघा गाउँपालिका हुँदै पर्यटक कन्चनजंघा हिमालको आधार शिविर पुग्ने गर्दछन्। यो पदर्माग (साउथ रुट)मा पर्ने कन्चनजंघा व्यवस्थापन परिषद्को याम्फुदीन कार्यालयका पर्यटन सहायक सूर्यमान राईले बताए।
काठमाडौँदेखि हवाईमार्ग भएर ताप्लेजुङको सुकेटर विमानस्थलसम्म पुगेर फक्ताङलुङ गाउँपालिका हुँदै कन्चनजंघा हिमालको आधार शिविर पुगिन्छ। यो पदर्माग (नर्थ रुट)मा पर्दछ। कन्चनजंघा क्षेत्र जाने पर्यटकको विवरण कन्चनजंघा संरक्षण क्षेत्र व्यवस्थापन परिषद्ले राख्दै आएको छ।
