चालु आवको तीन महिना : मूल्यवृद्धि ६.३७ प्रतिशत

हिमाल प्रेस ३ मंसिर २०८३ २०:०३ | Thursday, November 19, 2026
8
SHARES
चालु आवको तीन महिना : मूल्यवृद्धि ६.३७ प्रतिशत

काठमाडौँ – चालु आर्थिक वर्ष २०८३/८४ को पहिलो तीन महिनामा वार्षिक विन्दुगत उपभोक्ता मूल्यवृद्धि (मुद्रास्फीति) ६ दशमलव ३७ प्रतिशत रहेको छ।

नेपाल राष्ट्र बैंकले बिहीबार सार्वजनिक गरेको देशको वर्तमान आर्थिक तथा वित्तीय स्थिति प्रतिवेदनअनुसार गत असोज मसान्तसम्ममा विदेशी मुद्रा सञ्चिति ४१ खर्ब १४ अर्ब रुपैयाँ पुगेको छ।

अमेरिकी डलरमा यस्तो सञ्चिति २७ अर्ब ३९ करोड डलर रहेको छ। उक्त सञ्चितिले १७ दशमलव दुई महिनाको वस्तु तथा सेवा आयात धान्न पर्याप्त हुने राष्ट्र बैंकले जनाएको छ।

प्रतिवेदनअनुसार समीक्षा अवधिमा चालु खाता दुई खर्ब ७९ अर्ब ११ करोड र शोधनान्तर स्थिति तीन खर्ब तीन अर्ब ७९ करोड रुपैयाँ बचतमा रहेको छ। यस अवधिमा विप्रेषण आप्रवाह नेपाली रुपैयाँमा २७.२ प्रतिशत र अमेरिकी डलरमा १६.७ प्रतिशतले वृद्धि भएको छ। चालु आर्थिक वर्षको असोज महिनामा मात्रै विप्रेषण आप्रवाह दुई खर्ब ६७ अर्ब ३४ करोड रुपैयाँ रहेको छ।

त्यस्तै, समीक्षा अवधिमा निर्यात ५७ प्रतिशत र आयात ३८.२ प्रतिशतले बढेको छ। नेपाल सरकारको कुल खर्च तीन खर्ब ९६ अर्ब २७ करोड रुपैयाँ रहेको छ भने राजस्व परिचालन दुई खर्ब ९८ अर्ब ६१ करोड रुपैयाँ रहेको प्रतिवेदनमा उल्लेख छ।

त्यस्तै, विस्तृत मुद्राप्रदाय चार दशमलव चार प्रतिशतले बढेको छ। वार्षिक बिन्दुगत आधारमा यस्तो मुद्राप्रदाय १४ दशमलव ८ प्रतिशतले वृद्धि भएको छ।

प्रतिवेदनअनुसार बैंक तथा वित्तीय संस्थाको निक्षेप परिचालन दुई दशमलव आठ प्रतिशतले र निजी क्षेत्रमा प्रवाहित कर्जा तीन दशमलव एक प्रतिशतले बढेको छ।

वार्षिक विन्दुगत आधारमा निक्षेपको वृद्धिदर १३ दशमलव सात प्रतिशत र निजी क्षेत्रमा प्रवाहित कर्जाको वृद्धिदर आठ दशमलव तीन प्रतिशत रहेको छ।

बैंक तथा वित्तीय संस्थाबीचको भारित औसत अन्तरबैंक दर दुई दशमलव ७५ प्रतिशत रहेको छ भने ९१ दिने अवधिको ट्रेजरी बिलको भारित औसत ब्याजदर एक दशमलव ०१ प्रतिशत रहेको छ।

त्यसैगरी, वाणिज्य बैंकहरूको निक्षेपको भारित औसत ब्याजदर तीन दशमलव ०७ प्रतिशत र कर्जाको भारित औसत ब्याजदर छ दशमलव ३१ प्रतिशत रहेको राष्ट्र बैंकले जनाएको छ।

प्रकाशित: ३ मंसिर २०८३ २०:०३ | Thursday, November 19, 2026

प्रतिक्रिया

Leave a Reply

Your email address will not be published. Required fields are marked *

5 × 2 =


© Nepali horoscope

© Gold Price Nepal

© Nepal Exchange Rates
© Nepal weather forecast