हिमाल प्रेस 
काठमाडौँ- श्रम संस्कृति पार्टी कोशी प्रदेशले आगामी असोजको पहिलो सातादेखि ‘केचना कवल टु सगरमाथा हातेमालो अभियान’ सञ्चालन गर्ने भएको छ। शनिबार धरानमा सम्पन्न पार्टीको प्रदेश सचिवालय बैठकले प्रदेशको तराईदेखि हिमालसम्म पुग्ने गरी अभियान सञ्चालन गर्ने निर्णय गरेको हो।
पार्टीका प्रदेश अध्यक्ष प्रताप राईका अनुसार अभियानको मुख्य उद्देश्य कोशीका विभिन्न भूगोल, समुदाय र संस्कृतिबीच आपसी सम्बन्धलाई थप मजबुत बनाउँदै जनस्तरसम्म राजनीतिक तथा सांस्कृतिक संवाद स्थापित गर्नु हो।
अभियानमार्फत तराई, पहाड र हिमाली क्षेत्रका नागरिकबीच प्रत्यक्ष भेटघाट, अन्तरक्रिया तथा संवाद गर्ने योजना पार्टीले बनाएको छ। विभिन्न जातजाति, भाषा, संस्कृति र समुदायबीच रहेको विविधतालाई प्रदेशको साझा शक्ति र पहिचानका रूपमा स्थापित गर्ने उद्देश्यसमेत अभियानले बोकेको अध्यक्ष राईले बताए।
राईका अनुसार राजनीतिक दल र जनताबीचको सम्बन्ध केवल निर्वाचनका समयमा मात्र सीमित नभई निरन्तर संवाद, सहकार्य र सहभागितामा आधारित हुनुपर्ने पार्टीको धारणा छ। त्यसैले जनताको दैनिक जीवन, स्थानीय समस्या, आवश्यकता, सम्भावना तथा विकासका विषयमा प्रत्यक्ष रूपमा जनतासँग संवाद गर्ने गरी अभियान अघि बढाइनेछ।
‘केचना कवल टु सगरमाथा’लाई प्रदेशको भौगोलिक विविधतालाई समेट्ने प्रतीकका रूपमा प्रस्तुत गर्दै पार्टीले तराईदेखि हिमालसम्मका नागरिकलाई एउटै अभियानमा जोड्ने लक्ष्य लिएको जनाएको छ। अभियानका क्रममा स्थानीय समुदायका मौलिक संस्कृति, परम्परा, भाषा तथा जीवनशैलीलाई बुझ्ने र तिनका संरक्षण तथा प्रवर्द्धनका विषयमा समेत छलफल गरिने बताइएको छ।
पार्टीका अनुसार अभियान केवल राजनीतिक कार्यक्रमका रूपमा नभई सांस्कृतिक, सामाजिक र राजनीतिक संवादको साझा अभियानका रूपमा सञ्चालन हुनेछ। स्थानीय नागरिक, सामाजिक अभियन्ता, बुद्धिजीवी, युवा, विभिन्न समुदायका प्रतिनिधि तथा राजनीतिक व्यक्तित्वसँग प्रत्यक्ष संवाद गर्ने योजना रहेको जनाइएको छ।
प्रदेश सचिवालय बैठकले अभियानलाई प्रभावकारी बनाउन आवश्यक तयारी, समन्वय तथा व्यवस्थापनका विषयमा समेत छलफल गरेको थियो। अभियानको विस्तृत कार्यतालिका, सहभागी हुने क्षेत्र तथा कार्यक्रमहरूको स्वरूप आगामी दिनमा तय गरिने पार्टीले जनाएको छ।
श्रम संस्कृति पार्टीले प्रदेशको भौगोलिक तथा सांस्कृतिक विविधताबीच एकता र सहकार्यको वातावरण निर्माण गर्दै जनतासँग प्रत्यक्ष सम्बन्ध विस्तार गर्न अभियानले महत्वपूर्ण भूमिका खेल्ने विश्वास व्यक्त गरेको छ।
