हिमाल प्रेस 
काठमाडौँ- अविरल वर्षा, बाढी र पहिरोका कारण देशभरका प्रमुख राजमार्ग तथा सडक खण्डहरू अवरुद्ध भएका छन्। नेपाल प्रहरीले सोमबार बिहान ६ बजेसम्मको विवरण सार्वजनिक गर्दै विभिन्न जिल्लाका सडकको स्थितिबारे जानकारी दिएको हो।
मकवानपुरस्थित कान्तिलोकपथको हेटौँडा-ठिङ्गन-बागमती-ललितपुर सडक खण्डमा सम्भावित बाढी र पहिरोका कारण साँझ १८:०० देखि बिहान ०५:०० बजेसम्म रातिको समयमा सवारी सञ्चालनमा रोक लगाइएको छ।
रसुवाको उत्तरगया गाउँपालिका-५ खाल्टेस्थित त्रिशुली मैलुङ स्याफ्रुबेशी सडक खण्ड बाढीका कारण लामो समयसम्मका लागि पूर्ण रूपमा अवरुद्ध भएको छ। नुवाकोटमा टोखा छहरे सडक खण्डअन्तर्गत शिवपुरी गाउँपालिका-८ घट्टेखोलामा सम्भावित बाढी र पहिरोका कारण राति २२:०० देखि बिहान ०५:०० बजेसम्म सवारी साधन चलाउन रोक लगाइएको छ। साथै नुवाकोटका अन्य मुख्य राजमार्ग तथा पसाङ ल्हामु सडक खण्ड पनि बाढीका कारण पूर्ण रूपमा अवरुद्ध रहेका छन्।
सिन्धुपाल्चोकको भोटेकोशी गाउँपालिका-२ कोदारीस्थित अरनिको राजमार्ग पहिरोका कारण पूर्ण रूपमा अवरुद्ध भएको छ। धादिङस्थित पृथ्वी राजमार्गको बेनिघाट रोराङ गाउँपालिका-७ कृष्ण भिर र गजुरी गाउँपालिका-२ परेवा भिरमा पहिरो जाँदा सडक पूर्ण रूपमा ठप्प बनेको छ।
कर्णाली प्रदेशको मुगुस्थित छायाँनाथ रारा नगरपालिका-७ झ्यारीखोला र टोक्ला क्षेत्रमा पहिरो जाँदा नाग्मदेखि मुगु गमगढी आउने सडक खण्ड पूर्ण रूपमा अवरुद्ध भएको छ।
अवरुद्ध सडकहरू सुचारु गराउन प्रयास भइरहेको र यात्रुहरूलाई यात्रा गर्दा विशेष सजगता अपनाउन प्रहरीले अनुरोध गरेको छ।
