हिमाल प्रेस 
काठमाडौँ- नेपाल कम्युनिस्ट पार्टी (एमाले) का अध्यक्ष केपी शर्मा ओलीले सुनसरीको देवानगन्ज गाउँपालिका र सिरहामा भएको गोलीकाण्डप्रति गम्भीर चिन्ता व्यक्त गर्दै सरकारले बल प्रयोग रोक्न र तत्काल संवादमार्फत समाधान खोज्न आग्रह गरेका छन्।
ओलीले बिहीबार जारी गरेको अपिलमा सुनसरीको देवानगन्जमा उत्पन्न तनावग्रस्त परिस्थितिमा राज्य पक्षबाट भएको बल प्रयोग, त्यस क्रममा स्थानीय युवा ओमप्रकाश मेहताको मृत्यु तथा सिरहामा गणेश यादवको गोली लागेर भएको निधनप्रति दुःख व्यक्त गरेका छन्।
उनले लेखेका छन्, ‘राष्ट्रिय सुरक्षा र सामाजिक सुव्यवस्था संवेदनशील अवस्थामा पुग्दा समेत सरकारले देखाएको उदासीनता, अत्यधिक बल प्रयोग र मौनता अत्यन्त शंकास्पद एवं भर्त्सनायोग्य छ । हिंसात्मक कदम तत्काल रोकी अविलम्ब संवादको माध्यमबाट समाधान खोज्न आग्रह गर्दछु।’
ओलीले वर्तमान संवेदनशील परिस्थितिमा चारबुँदे अपिल जारी गर्दै नागरिकहरूलाई संयम अपनाउन र सामाजिक सद्भाव कायम राख्न आग्रह गरेका छन्। उनले जनतालाई विभाजित गर्ने उद्देश्यले भ्रामक प्रचार हुन सक्ने भन्दै त्यसको पछि नलाग्न एमालेका नेताकार्यकर्ता, अन्य राजनीतिक दल, नागरिक समाज, सञ्चारकर्मी तथा आमनागरिकलाई आग्रह गरेका छन्।
मुलुक विषम परिस्थितिबाट गुज्रिरहेको भन्दै ओलीले प्रमुख राजनीतिक दलहरूलाई आपसी प्रतिस्पर्धा र आरोप–प्रत्यारोपभन्दा माथि उठेर शान्ति, सुरक्षा र स्थायित्वका लागि सहकार्य गर्न आग्रह गरेका छन्। उनले द्वन्द्व र हिंसाले कुनै पनि समस्याको समाधान गर्न नसक्ने उल्लेख गर्दै संवाद, सहमति र जिम्मेवार राजनीतिक सहकार्यबाट मात्रै वर्तमान जटिल अवस्थाबाट मुलुकलाई निकास दिन सकिने बताएका छन्।
ओलीले राष्ट्रको शान्ति, सुरक्षा र सामाजिक सद्भावमाथि चुनौती देखिएको वर्तमान अवस्थामा सबै राजनीतिक दल, नागरिक समाज, बुद्धिजीवी तथा धार्मिक–सामाजिक अगुवाहरूलाई राष्ट्रिय हित र शान्ति स्थापनाका लागि एकजुट हुन आह्वान गरेका छन्।
साथै, विभिन्न स्थानमा गोली लागी थप नागरिकको ज्यान गएको खबरले आफू अत्यन्त स्तब्ध र मर्माहत भएको उल्लेख गरेका छन्। उनले घटनामा ज्यान गुमाएकाहरूप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरेका छन् भने घाइतेहरूको शीघ्र स्वास्थ्यलाभको कामना गरेका छन्।
यस्तो छ ओलीको अपिल
सुनसरी जिल्लाको देवानगञ्ज गाउँपालिकामा विगत केही दिनदेखि उत्पन्न तनावग्रस्त परिस्थिति, राज्य पक्षबाट भएको बल प्रयोग तथा त्यस क्रममा स्थानीय युवा ओमप्रकाश मेहता, आज सिरहाका गणेश यादवको गोली लागेर भएको दुःखद निधन र अन्य नागरिकहरू गम्भीर घाइते भएको घटनाप्रति हाम्रो पार्टी नेपाल कम्युनिष्ट पार्टी (एमाले) को गम्भीर ध्यानाकर्षण भएको छ।
अमानवीय क्रम रोकिनुको सट्टा झन् उग्र बन्दै आज सिरहा लगायतका विभिन्न स्थानहरूमा समेत गोली लागी थप नागरिकहरूको ज्यान गएको खबरले हामीलाई अत्यन्त स्तब्ध र मर्माहत बनाएको छ । यस हिंसामा ज्यान गुमाउनुभएकाहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गर्दछु । साथै, घाइते नागरिकहरूको शीघ्र स्वास्थ्यलाभको कामना गर्दछु । यस जटिल र संवेदनशील घडीमा सम्पूर्ण नागरिक, राजनीतिक दल तथा सरोकारवालाहरूसँग म निम्नअनुसार अपिल गर्दछु:
१. संयमता र सामाजिक सद्भाव : नागरिकहरूबीचको एकता र भ्रातृत्व नै राष्ट्रको बल हो। जनतालाई आपसमा विभाजित गर्दै अवाञ्छित उद्देश्य पूरा गर्ने षड्यन्त्रहरू भइरहेको हुन सक्नेतर्फ सचेत हुँदै नेकपा (एमाले) र अन्य राजनीतिक पार्टीका नेता-कार्यकर्ता, नागरिक समाज र सञ्चारकर्मी लगायत सम्पूर्ण आम नागरिकहरूलाई कुनै पनि प्रकारको भ्रामक प्रचारको पछि नलागी संयमित हुन, सामाजिक सद्भाव र एकता कायम राख्नकालागि सक्रिय हुन हार्दिक अनुरोध गर्दछु।
२. सरकारको गैरजिम्मेवार भूमिका र मौनता : नागरिकको जीउधनको रक्षा गर्नु र संवादको माध्यमबाट समस्याको समाधान गरी देशलाई शान्तिको बाटोमा लैजानु सरकारको प्राथमिक दायित्व हो। तर, राष्ट्रिय सुरक्षा र सामाजिक सुव्यवस्था संवेदनशील अवस्थामा पुग्दा समेत सरकारले देखाएको उदासीनता, अत्यधिक बल प्रयोग र मौनता अत्यन्त शंकास्पद एवं भर्त्सनायोग्य छ। हिंसात्मक कदम तत्काल रोकी अविलम्ब संवादको माध्यमबाट समाधान खोज्न आग्रह गर्दछु।
३. दलहरूबीच राजनीतिक सहकार्य : मुलुक विषम परिस्थितिबाट गुज्रिरहेको बेला मुख्य राजनीतिक दलहरूले आपसी राजनीतिक प्रतिस्पर्धा, आरोप-प्रत्यारोप र सस्तो लोकप्रियताभन्दा माथि उठेर मुलुकमा शान्ति, सुरक्षा र स्थायित्व कायम गर्न सहकार्य गर्नु आवश्यक छ।
४. राष्ट्रिय एकता र शान्तिका लागि आह्वान: द्वन्द्व र हिंसाबाट समस्याको समाधान हुन सक्दैन । संवाद, सहमति र जिम्मेवार सहकार्यले नै वर्तमान जटिलताबाट मुलुकलाई निकास दिने छ । राष्ट्रको अस्तित्व, शान्ति-सुरक्षा र सामाजिक सद्भावमाथि संकट आउन लागेको यस घडीमा म सम्पूर्ण राजनीतिक दल, नागरिक समाज, बुद्धिजीवी तथा विभिन्न धार्मिक एवं सामाजिक सम्प्रदायका अगुवाहरूलाई राष्ट्रिय हित र शान्ति स्थापनाका लागि एकजुट हुन हार्दिक आह्वान गर्दछु।
