ट्रम्पको आग्रहमा गरिएको फिफाको निर्णयमाथि विश्वभर आलोचना

काठमाडौँ– अमेरिकी राष्ट्रपति डोनाल्ड ट्रम्पले फिफा विश्वकपमा संयुक्त राज्य अमेरिकाका स्ट्राइकर फोलारिन बालोगुनमाथि लागेको एक खेलको निलम्बन पुनरवलोकन गर्न आफूले फिफालाई आग्रह गरेको पुष्टि गरेका छन्।

२५ वर्षीय बालोगुन बोस्निया–हर्जेगोभिनाका डिफेन्डर तारिक मुहारेमोभिचमाथि गरेको फाउलका कारण अघिल्लो चरणमा रातो कार्ड पाएपछि बेल्जियमविरुद्धको अन्तिम १६ को खेल गुमाउने अवस्थामा थिए।

तर फिफाले अप्रत्याशित निर्णय गर्दै स्वतः लागू हुने एक खेलको प्रतिबन्धलाई १२ महिनाका लागि निलम्बन गरिदियो। यस निर्णयको युरोपेली फुटबल महासंघ (यूईएफए), बेल्जियम र इंग्ल्यान्डका मुख्य प्रशिक्षक थोमस टुचेललगायतबाट व्यापक आलोचना भएको छ।

यस निर्णयसँगै यस विश्वकपमा तीन गोल गरिसकेका अमेरिकी फरवार्ड बालोगुन अब सियाटलमा हुने बेल्जियमविरुद्धको खेलमा छनोटका लागि उपलब्ध भएका छन्। उक्त खेल स्थानीय समयअनुसार साँझ ५ बजे सुरु हुनेछ।

ट्रम्पले फिफाले सही निर्णय गरेको बताए। उनका अनुसार प्रतिबन्ध कार्यान्वयन गरिएको भए त्यसले प्रतियोगितामाथि ठूलो दाग लगाउने थियो।

सोमबार ह्वाइट हाउसमा सञ्चारकर्मीसँग कुरा गर्दै ट्रम्पले आफूले फिफासँग निर्णय पुनरवलोकन गर्न आग्रह गरेको कारण त्यो फाउल नै थिएन भन्ने विश्वास रहेको बताए।

उनले आफूले फिफा अध्यक्ष जियानी इन्फान्टिनोसँग कुरा गरेको पुष्टि गरे। तर आफूले पुनरवलोकनको आग्रह मात्र गरेको र बालोगुनको प्रतिबन्ध स्थगित गर्न कुनै दबाब नदिएको स्पष्ट पारे।

ट्रम्पले भने, ‘मलाई लाग्छ, त्यो प्रतिबन्धले प्रतियोगितामाथि ठूलो दाग छोड्ने थियो। म फिफालाई के गर्ने भनेर आदेश दिन सक्दिनँ। मेरो विश्वासमा त्यो निर्णय सम्बन्धित आयोगले गरेको हो र त्यो सही निर्णय थियो।’

ट्रम्पले रेफ्री राफाएल क्लाउसले बालोगुनलाई रातो कार्ड देखाउने निर्णयलाई भयानक भन्दै ब्राजिलका ती रेफ्रीप्रति पनि शंका व्यक्त गरे।

इन्फान्टिनोले सामाजिक सञ्जाल एक्समा जारी गरेको वक्तव्यमा ट्रम्पको फोन आएपछि आफूले अमेरिकी राष्ट्रपतिलाई फिफाका स्वतन्त्र न्यायिक निकायमार्फत कानुनी प्रक्रिया चलिरहेको छ र सक्षम निकायले उचित समयमा निर्णय गर्नेछ भनेर जानकारी गराएको बताएका छन्।

यसअघि सोमबार बेल्जियमको रोयल बेल्जियन फुटबल संघले फिफाको निर्णयप्रति आफू अचम्मित भएको जनाएको थियो। त्यसको भोलिपल्ट यूईएफएले यो निर्णयले फुटबलको निष्पक्षता जोखिममा पारेको टिप्पणी गर्‍यो।

बीबीसी स्पोर्टले ट्रम्पका टिप्पणी, रेफ्री क्लाउसबारे उनको धारणा, बेल्जियमको आपत्ति र अपिल प्रक्रियाबारे प्रतिक्रिया माग्दा फिफाले अहिलेलाई थप केही भन्नु छैन भन्ने संक्षिप्त जवाफ दिएको थियो।

तर पछि इन्फान्टिनोले फिफाका न्यायिक निकायहरू स्वतन्त्र रहेको र तिनका निर्णय सधैँ सम्मान गर्नुपर्ने बताए।

उनले भने, ‘फिफाको अनुशासन समितिले निर्णय सार्वजनिक गर्दा म ती निर्णयहरू पढ्छु। कहिलेकाहीँ म आश्चर्यचकित हुन्छु। कहिलेकाहीँ सहमत हुन्छु, कहिलेकाहीँ असहमत पनि हुन्छु। तर म जहिले पनि ती निर्णय र निर्णय गर्ने निकायहरूको स्वतन्त्रताको सम्मान गर्छु। व्यक्तिगत रूपमा हामीलाई कुनै निर्णय मन परोस् वा नपरोस्, त्यो महत्त्वपूर्ण होइन।’

बेल्जियमको आपत्ति, टुचेलको चिन्ता

बालोगुनमाथिको रातो कार्ड निलम्बन गर्ने निर्णयप्रति आपत्ति जनाउँदै रोयल बेल्जियन फुटबल संघले विज्ञप्तिमा भनेको छ, ‘यस खेलको नतिजा जे भए पनि घटनाक्रमप्रति आरबीएफए गम्भीर रूपमा चिन्तित छ। हामी आगामी घण्टा, दिन र महिनाहरूमा पनि नैतिकता, निष्पक्ष प्रतिस्पर्धा र समग्र फुटबलको हितका आधारभूत सिद्धान्तहरूको रक्षाका लागि संघर्ष जारी राख्नेछौँ।’

इंग्ल्यान्डका मुख्य प्रशिक्षक थोमस टुचेलले पनि यो निर्णयले खतरनाक नजिर स्थापित गरेको बताए।

मेक्सिकोविरुद्ध इंग्ल्यान्डको ३–२ को रोमाञ्चक जितमा डिफेन्डर जारेल क्वान्साहले पनि रातो कार्ड पाएका थिए।

टुचेलले भने, ‘सीमा कहाँ कोर्ने भन्ने मेरो प्रश्न हो। यसको जवाफ मसँग छैन। यदि पहेँलो कार्ड गलत भयो भने पनि अपिल गर्ने? रातो कार्ड सही हो कि होइन भन्ने कसले निर्धारण गर्ने? यसको सुरुवात कहाँबाट हुन्छ र अन्त्य कहाँ पुग्छ? यही मेरो प्रश्न हो, तर यसको उत्तर मसँग छैन।’

विश्वकप इतिहासमा दिइएका अन्य १८९ रातो कार्डमध्ये एकपटक मात्र कुनै खेलाडी प्रतिबन्धबाट जोगिएको तथ्यांक छ। त्यो सन् १९६२ मा ब्राजिलका गारिन्चाको घटना थियो। त्यतिबेला स्वतः प्रतिबन्ध लागू हुने व्यवस्था थिएन र उनीमाथि कारबाही नगरिनुमा राजनीतिक हस्तक्षेप भएको आरोप लागेको थियो।

फिफाले आफ्नो अनुशासन संहिताको धारा २७ उद्धृत गर्दै अनुशासनात्मक कारबाहीलाई आंशिक रूपमा निलम्बन गर्न सकिने अधिकारका आधारमा बालोगुनको एक खेलको प्रतिबन्धलाई एक वर्षको परीक्षण अवधिका लागि स्थगित गरिएको जनाएको छ। तर बालोगुनको हकमा किन यस्तो निर्णय गरियो भन्नेबारे फिफाले कुनै विशेष कारण सार्वजनिक गरेको छैन।