हिमाल प्रेस 
काठमाडौँ- झापाको भद्रपुर नगरपालिका ८ स्थित जिल्ला प्रशासन कार्यालय नजिकको भित्री सडकखण्डमा कारको ठक्करबाट ९२ वर्षीया वृद्धाको मृत्यु भएको छ।
कारागार कार्यालय झापाबाट जिल्ला प्रशासन कार्यालयतर्फ आउँदै गरेको प्र१-०१-००२ च ०००५ नम्बरको सेतो कारले जिल्ला प्रशासन कार्यालयको काम सकेर सडकतर्फ निस्किँदै गरेकी भद्रपुर नगरपालिका ९ बस्ने ९२ वर्षीया धनमाया खड्कालाई ठक्कर दिएको नेपाल प्रहरीको समाचार शाखाले जनाएको छ। दुर्घटनामा गम्भीर घाइते भएकी खड्कालाई उपचारका लागि ओमसाई पाथिभरा अस्पताल लगिएकोमा चिकित्सकले मृत घोषणा गरेका हुन् ।
कार चालकले नै उनलाई सोही गाडीमा अस्पताल पुर्याएका थिए । शव सोही अस्पतालमा रहेको छ । कार र चालक झापा बुद्धशान्ति गाउँपालिका–२ बस्ने ४६ वर्षीय मदन प्रसाईलाई नियन्त्रणमा लिईएको छ । घटनाबारे थप अनुसन्धान भइरहेको छ।
प्रकाशित: १३ साउन २०८३ १३:१९ | Wednesday, July 29, 2026
प्रतिक्रिया
