विद्यालय सुधारका अभियन्ता प्रअको आत्महत्या, सामाजिक सञ्जालमा भावुक नोट भाइरल

काठमाडौँ- दार्चुलाको व्याँस गाउँपालिका-४ सुन्सेरास्थित सम्पाल माध्यमिक विद्यालयका प्रधानाध्यापक बलदेवसिंह धामीले सोमबार विद्यालय परिसरमै आत्महत्या गरेका छन्। गाउँपालिका उपाध्यक्ष विनोदसिंह कुँवरले प्रअ धामीले आत्महत्या गरेको पुष्टि गरेका हुन्।

‘विद्यालय पालिकाबाट नजिकै पर्छ। हेडसर झुन्डिएको अवस्थामा स्कुलका सरहरूले थाहा पाउनुभएछ अनि प्रहरीलाई खबर गर्नुभएछ। मलाई बिहान ६ बजे थाहा भयो। गाउँबाट म टाढा थिएँ। गाउँकै एक जनाले फोन गरेर जानकारी गराउनुभयो। विद्यालयको दोस्रो तलाबाट झुन्डिनुभएछ,’ उनले भने।

विद्यालय सुधार, शैक्षिक अनुशासन र व्यवस्थापनमा सक्रिय मानिएका धामीले आत्महत्यापूर्व सामाजिक सञ्जालमार्फत सार्वजनिक गरेको लामो सन्देश (सुसाइड नोट) मा आफू योजनाबद्ध मानसिक दबाब, सामाजिक अपमान र चरित्रहत्याको सिकार भएको उल्लेख गरेका छन्। उनले लेखेका छन्, ‘इमानदारी, पारदर्शिता र जवाफदेहीता मेरो कार्यशैली थियो तर दुष्मन र पापीहरूले मेरो सुन्दर परिवार ध्वस्त बनाए।’

धामीले आफूले विद्यालयलाई नमुना विद्यालय बनाउने लक्ष्यसहित २०७७ सालमा सम्पाल माध्यमिक विद्यालयमा सरुवा भएर आएको उल्लेख गरेका छन्। विद्यालयमा कुनै प्रणाली र व्यवस्थापन नरहेको अवस्थामा आफूले पाँच वर्षभित्र नमुना विद्यालय बनाउने संकल्पसहित काम थालेको उनको भनाइ छ।

उनले आफ्नो कार्यकालमा १८ कोठे पक्की भवन निर्माण, स्मार्ट बोर्ड जडान, पुस्तकालय, आईसीटी तथा विज्ञान प्रयोगशाला स्थापना, बालमैत्री शौचालय निर्माण, निःशुल्क पोसाक वितरण, अतिरिक्त कक्षा सञ्चालन तथा विद्यालयको आर्थिक प्रणाली व्यवस्थित गरेको दाबी गरेका छन्।

धामीले विद्यालयको खातामा आफू जाँदा ५०० रुपैयाँ मात्र रहेको र अहिले १२ लाख रुपैयाँ पुर्‍याएको उल्लेख गरेका छन्। आत्महत्यापूर्वको सन्देशमा उनले केही शिक्षक, स्थानीय व्यक्ति र अन्य पक्षहरूले आफूलाई योजनाबद्ध रूपमा फसाउने प्रयास गरेको आरोप लगाएका छन्।

आफूविरुद्ध झुटा आरोप फैलाइएको, सामाजिक प्रतिष्ठामाथि आक्रमण गरिएको तथा मानसिक रूपमा कमजोर बनाइएको उनले बताएका छन्। ‘मेरो सामाजिक प्रतिष्ठा, आत्मसम्मान र चरित्रमाथि गम्भीर प्रहार भयो, त्यसैले आत्महत्या गर्न बाध्य भएँ,’ उनले लेखेका छन्।

धामीले केही व्यक्तिहरूको नामसमेत उल्लेख गर्दै उनीहरूले आफूलाई बदनाम गराउने, झुटा सूचना फैलाउने र मानसिक यातना दिने काम गरेको आरोप लगाएका छन्। उनले घटनाको निष्पक्ष अनुसन्धान गरी दोषीमाथि कारबाही गर्न माग गरेका छन्। उनले आफ्नो मृत्युपछि डीएनए परीक्षण गर्न तथा सत्यतथ्य सार्वजनिक गर्न परिवारलाई आग्रहसमेत गरेका छन्। ‘दूधको दूध र पानीको पानी होस्,’ उनले लेखेका छन्।

घटनापछि जिल्ला प्रहरी कार्यालय दार्चुलाले घटनाको अनुसन्धान सुरु गरेको जनाएको छ। प्रहरीले सामाजिक सञ्जालमा सार्वजनिक सामग्री, फोन सम्पर्क, घटनास्थल र अन्य प्रमाणका आधारमा अनुसन्धान अघि बढाइने जनाएको छ। जिल्ला प्रहरी कार्यालयबाट प्रहरी निरीक्षकको कमान्डमा एउटा टोली विद्यालयमा गएको छ।

यो घटनाले स्थानीय समुदाय, अभिभावक तथा शिक्षा क्षेत्रमा  गम्भीर बहस सिर्जना गरेको छ। शिक्षा क्षेत्रमा कार्यरत शिक्षक तथा प्रधानाध्यापकमाथि हुने मानसिक दबाब, गुटबन्दी, सामाजिक चरित्रहत्या तथा असुरक्षित कार्य वातावरणका कारण यस्तो दुःखद अवस्था आएको भन्दै निष्पक्ष छानबिनको माग उठिरहेको छ।

उनका सहकर्मी शिक्षकहरूले सामाजिक सञ्जालमा एक शैक्षिक अभियन्ताको दु:खद निधनले मुलुकको शिक्षा क्षेत्रका लागि अपूरणीय क्षति भएको उल्लेख गरेका छन्। उनीहरूका अनुसार रामेछापबाट सरुवा भएपछि प्रअ धामी विद्यालयलाई नमुना बनाउने अभियानमा सक्रिय भएका थिए।

स्थानीयवासीले विद्यालय सुधारका लागि काम गर्ने शिक्षक तथा प्रधानाध्यापकलाई सुरक्षित र सम्मानजनक कार्य वातावरण सुनिश्चित गर्न राज्यले प्रभावकारी नीति ल्याउनुपर्ने बताएका छन्।

यसैबीच रामेछापको बेथानस्थित कुशेश्वर माविले विद्यालयका पूर्वशिक्षकसमेत रहेका धामीको निधनमा सोमबार विद्यालय बन्द गरेको छ। धामीको निधनमा एक दिन शोक बिदा दिइएको प्रधानाध्यापक राजेन्द्र घिमिरेले जनाएका छन्। धामीले उक्त विद्यालयमा प्राध्यापन गरेका थिए।

यस्तो छ बलदेव धामीले आत्महत्या गर्नुअघि सामाजिक सञ्जालमा लेखेको सन्देश