वरिष्ठ गायक आचार्यको शवमा प्रधानमन्त्रीले ओढाए राष्ट्रिय झन्डा

काठमाडौँ- वरिष्ठ गायक एवम् संगीतकार भक्तराज आचार्यको शवमा प्रधानमन्त्री पुष्पकमल दाहाल ‘प्रचण्ड’ ले राष्ट्रिय झन्डा ओढाएर श्रद्धाञ्जली अर्पण गरेका छन्।

प्रधानमन्त्री प्रचण्ड मंगलबार आचार्यको शव राखिएको स्थान नेपाल संगीत तथा नाट्यकला प्रतिष्ठानमा पुगेर पार्थिव शरीरमा श्रद्धाञ्जली अर्पण गरेका हुन्। श्रद्धाञ्जलि अर्पणका लागि नेकपा एमाले अध्यक्ष एवम् पूर्वप्रधानमन्त्री केपी शर्मा ओली पनि प्रधानमन्त्री प्रचण्डसँगै प्रतिष्ठानमा पुगेका थिए।

संस्कृति पर्यटन तथा नागरिक उड्डयनमन्त्री सुदन किराँती र प्रमुख निर्वाचन आयुक्त दिनेश थपलियाले पनि प्रतिष्ठानमा पुगेर दिवंगत आचार्यको पार्थिव शरीरमा श्रद्धाञ्जलि अर्पण गरेका छन्। यसअघि

यसअघि आचार्यको पार्थिव शरीरमा श्रद्धाञ्जली अर्पण गर्नका लागि गीतकार, गायक, संगीतकार, कलाकार, राजनीतिक दलका नेता नक्सालस्थित नेपाल संगीत तथा नाट्य प्रज्ञा प्रतिष्ठानमा पुगेका थिए। श्रद्धाञ्जली दिनका लागि कांग्रेसका महामन्त्रीद्वय गगनकुमार थापा र विश्वप्रकाश शर्मा, संगीतकारहरू, गायकगायिका, अभिनेता, शुभेच्छुकलगायत ठूलो संख्यामा शुभेच्छुकहरू प्रतिष्ठानमा भेला भएका थिए।

भजनशिरोमणिको उपाधि पाएका आचार्यको सोमबार ८२ वर्षको उमेरमा निधन भएको थियो।
आचार्यले मुटु जलिरहेछ, जति चोट दिन्छौँ, जहाँ छन् बुद्धका आँखा, हजार सपनाहरूको, माया मेरी साँझ बिहान, हजार आँखा हेर्नेलगायत करिब चार सय गीतमा आवाज दिएका छन्।

१९९९ साल असोज १६ गते धनकुटामा बलभद्र आचार्य र रेणु आचार्यका पुत्रका रूपमा जन्मिएका भक्तराज स्वरसम्राट् नारायणगोपालका समकालीन हुन। २०३० सालमा रेडियो नेपालको गीत प्रतियोगितामा प्रथम भई स्वर्णपदक जितेका थिए। त्यसपछि सांगीतिक यात्रा अघि बढाएका उनले केही वर्ष रेडियो नेपालमा जागिर खाएका थिए।

उनीमाथि २०४६ साल मंसिर १९ गते राजधानीको बौद्धमा आक्रमण भएको थियो। आक्रमणमा उनको टाउकामा गम्भीर चोट लागेको थियो। २०५० सालमा क्यान्सरका कारण जिब्रो काटिएपछि उनको सांगीतिक यात्रा टुंगिएको थियो।

आचार्यको मंगलबार पशुपति आर्यघाटमा अन्त्येष्टि गर्ने कार्यक्रम छ। गायक आचार्यका दुई छोरा सत्यराज र स्वरूपराज पनि सांगीतिक क्षेत्रमै क्रियाशील छन्।