हिमाल प्रेस 
पोखरा– पोखरा महानगरपालिकाले सुन्तोला किसानहरूलाई प्रोत्साहन रकम हस्तान्तरण गरेको छ।
महानगरपालिका-२१ का सुन्तला उत्पादक किसानलाई सुन्तला बगैँचा व्यवस्थापन अभियानअन्तर्गत महानगरले सो रकम हस्तान्तरण गरेको हो।
वडाभित्र सुन्तला उत्पादन गरिरहेका कृषकको बगैँचा व्यवस्थापनअन्तर्गत प्रतिबोट १ सयका दरले कूल २५ लाख ५० हजार हस्तान्तरण गरिएको हो।
‘सिक्टस ग्रिनिङ’लगायतका ‘भाइरस’ एवं रोगका कारण विभिन्न स्थानमा सुन्तलाखेती संकटग्रस्त बन्दै गएका अवस्थामा विगत ४ वर्षयता महानगरपालिकामा सञ्चालित सुन्तला बगैँचा व्यवस्थापन कार्यक्रमले सकारात्मक प्रभाव पारेको पोखरा महानगरपालिका कृषि महाशाखा प्रमुख मनोहर कडरियाले बताए।
पछिल्लो डेढ दशकयता कास्कीका सुन्तला उत्पादनका पकेट क्षेत्र विभिन्न रोगका कारण संकटग्रस्त बन्दै गएसँगै महानगरपालिकाले बगैँचा व्यवस्थापन अभियान थालेको उनले जानकारी दिए।
प्राविधिक टोलीले प्रत्येक कृषकको सुन्तला बगैँचामा पुगेर गरिएको अनुगमनको आधारमा अनुदान उपलब्ध गराइने गरिएको छ।
पोखरा महानगरपालिकाले आइतबार आयोजित १ कार्यक्रमका मेयर धनराज आचार्यले सुन्तला बगैँचा व्यवस्थापनबापतको प्रोत्साहन रकम हस्तान्तरण गरेका हुन्।
महानगरपालिकाले तोकेअनुसारको कृषिउपजको न्यूनतम समर्थन मूल्यबापतको आव ०७९/८० को रकम उनले हस्तान्तरण गरेका हुन्।
कार्यक्रममा पोखरा च्याउ उत्पादक कृषक समूहलाई ५९ हजार २ सय २९ केजी च्याउको २१ लाख ४३ हजार ८ सय २२ तथा सावित्री हराभरा एकीकृत कृषि फार्मलाई गोलभेँडा २० टन, बन्दा ४० टन, काउली १ हजार ५ सय ५३ केजी, घिरौंला १ हजार १ सय ५ केजीको ४ लाख २९ हजार ५ सय ३७ को समर्थन मूल्य सहयोगको चेक हस्तान्तरण गरे।
आर्थिक वर्ष ०७९/८० अन्तर्गत यस पालिकाभित्र उत्पादन भएका तर तोकिएको मूल्य नपाएका १ लाख २७ हजार चार सय ९० केजी तरकारीको २७ लाख भुक्तानी दिएको छ।
महानगरले विभिन्न २३ वटा कृषिउपजको न्यूनतम मूल्य तोकेको छ। तोकिएको न्यूनतम समर्थन मूल्यभन्दा कम पर्ने अवस्थामा कम भएको रकमको भुक्तानी महानगरपालिकाले उपलब्ध गराउने व्यवस्था गरिएको छ।
यसका लागि खेती गर्नुपूर्व कृषकले आफूले उत्पादन गर्ने सम्भावित उत्पादन सूचीकृत गर्नुपर्ने, बजारमा प्रतिस्पर्धी मूल्यमा बेच्नुपर्नेलगायतका सर्त निर्धारण गरिएको कृषि महाशाखा प्रमुख कडरियाले जानकारी दिए।
कार्यक्रममा महामेयर आचार्य, पोखरा महानगरपालिका सहरी योजना आयोगका उपाध्यक्ष प्रेमलाल लामिछाने, पोखरा-२१ का वडाध्यक्ष दीपक सुवेदीलगायतले उत्पादनमा जोड दिन आग्रह गर्दै महानगरका तर्फबाट साथ र सहयोग हुने विश्वास व्यक्त गरे।
