२०.६८ प्रतिशतले आयात र ३२ प्रतिशतले निर्यात घट्यो

काठमाडौँ– चालु आर्थिक वर्ष २०७९/८० को ६ महिनामा आयात र निर्यात दुवै घटेको छ। भन्सार विभागको तथ्यांकअनुसार पुस मसान्तसम्म २०.६८ प्रतिशतले आयात र ३२ प्रतिशतले निर्यात घटेको छ। गत आर्थिक वर्ष २०७८/७९ को पुससम्म ९ खर्ब ९९ अर्ब ३४ करोड ४२ लाखको वस्तु आयात भएको थियो। चालु आवको सोही अवधिमा ७ खर्ब ९२ अर्ब ६६ करोड ६२ लाख रुपैयाँको आयात भएको छ।

त्यस्तै गत आवको पुससम्म १ खर्ब १८ अर्ब ८५ करोडको वस्तु तथा सेवा निर्यात भएको थियो। चालु आवको ६ महिनामा ८० अर्ब ८० करोड ७४ लाखको निर्यात भएको विभागले जनाएको छ। भन्सार विभागका अनुसार वैदेशिक व्यापारमा आयातको हिस्सा ९०.७५ र निर्यातको हिस्सा ९.२५ प्रतिशत छ।

पुस मसान्तसम्म नेपाललाई ७ खर्ब ११ अर्ब ८५ करोड रुपैयाँ व्यापार घाटा भएको छ। यो अवधिसम्म नेपालले कुल ८ खर्ब ७३ अर्ब ४७ करोडको वैदेशिक व्यापार गरेको छ। जुन गत आवको तुलनामा १९.१५ प्रतिशतले कमी हो। गत आवको पुससम्म ११ खर्ब १८ अर्ब १९ करोड रुपैयाँको व्यापार भएको थियो।