काठमाडौँको गैरीगाउँमा चारजनाको हत्या

काठमाडौँ- काठमाडौँको तीनकुनेस्थित गैरीगाउँमा चारजनाको हत्या भएको अवस्थामा शव फेला परेको छ। काठमाडौँ उपत्यका प्रहरी कार्यालयका प्रवक्ता प्रहरी वरिष्ठ उपरीक्षक दिनेशराज मैनालीले धारिलो हतियार प्रहार भएको अवस्थामा चार जनाको शव फेला परेको जानकारी दिए। घटना राति १२ बजेतिरको भएको अनुमान गरिएको छ।

दोलखा घर भएका करिब ५५ वर्षीय कुमार भुजेल, उनकी श्रीमती सुभद्रा वाइबा र कुमारकी आमा करिब ७० वर्षीया सुमित्रा भुजेल र मोरङ घर भएका करिब १९ वर्षीय नवीन राईको शव भेटिएको उपत्यका प्रहरी कार्यालयका प्रमुख एआईजी दीपक थापाले जानकारी दिए।

घटनामा संलग्न भएको आशंकामा प्रहरीले अनुसन्धानका लागि एकजनालाई नियन्त्रणमा लिएको छ। पक्राउ पर्नेमा २८ वर्षीय दीपेन्द्र राई छन्। राईलाई कपडा र जुत्तामा रगत लागेको अवस्थामा प्रहरीले नियन्त्रणमा लिएको बताइएको छ। घटना अनुसन्धानका लागि प्रहरी र तालिमप्राप्त कुकुरको समेत परिचालन गरिएको छ।