हिक्मत कार्की। फाइल तस्बिर।
इटहरी- कोशी प्रदेशमा वर्तमान मुख्यमन्त्री हिक्मत कार्की नेतृत्वको सरकार ढल्ने निश्चित भएको छ। नेपाली कांग्रेस, नेकपा माओबादी, नेकपा एकीकृत समाजवादी र जनता समाजवादी पार्टीले विश्वासको मत नदिने निर्णय गरेसँगै कार्की नेतृत्वको सरकार ढल्ने निश्चित भएको हो।
पछिल्लोपटक जसपा र माओबादी केन्द्र सरकारबाट बाहिरिएसँगै मुख्यमन्त्री कार्कीले आज (बिहीबार) तेस्रो अधिवेशनको पहिलो बैठकबाट विश्वासको मत माग्ने तयारी छ।
मुख्यमन्त्री हिक्मत कार्कीले प्रमुख विपक्षी र विपक्षी दललाई विश्वासको मत दिन औपचारिक पत्राचार गरेका थिए। तर, प्रमुख विपक्षी कांग्रेस, माओवादी केन्द्र र नेकपा एकीकृत समाजवादीले औपचारिक रुपमै दलको बैठकबाट मत नदिने निर्णय गरेका छन् भने जसपाले तटस्थ बस्ने निर्णय गरेको छ।
कोशीमा सत्तारुढ दल एमालेसँग ४० र राष्ट्रिय प्रजातन्त्र पार्टी (राप्रपा) सँग ६ जना सांसद छन्। ९३ सदस्यीय प्रदेशसभामा बहुमत पुर्याउन ४७ सांसद आवश्यक पर्छ। कार्कीले विश्वासको मत पाउन थप १ सांसदको साथ आवश्यक परेको छ।
विपक्षी दलहरूमध्ये नेपाली कांग्रेससँग २९, माओवादी (सभामुखसहित) १३, नेकपा (एकीकृत समाजवादी) सँग ४ र जसपासँग १ जना सांसद छन्।
