हिमाल प्रेस 
सर्लाही– सर्लाहीको हरिपुर्वा नगरपालिका कार्यालयमा तालाबन्दी भएको करिब २ महिना भयो। नगरका जनप्रतिनिधिबीच राजनीतिक आग्रह पूर्वाग्रह रहेका कारण लागेको लालबन्दी खुलाउने प्रयास कसैले नगर्दा नगरको विकास निर्माणको काम प्रभावित भएको छ।
नगरपालिकमा राजनीतिक विवादका कारण प्रमुख प्रशासकीय अधिकृत नगरपालिका आउन नमान्नु हरिपुर्वा नगरपालिकाका लागि कुनै अनौठो कुरा होइन। २ महिनाको अवधिमा ४ जना प्रमुख प्रशासकीय अधिकृत सरुवा भएर आए पनि कोही नबसेका मेयर विनोद साहले जानकारी दिए।
उनका अनुसार स्थानीय तहको दोस्रो निर्वाचनमार्फत नगरपालिकामा नयाँ जनप्रतिनिधि आएको भएको पनि १ वर्ष पूरा भएको छ तर आन्तरिक विवादका कारण नगरको विकासको काम ठप्पजस्तै छ।
राजनीतिक द्वन्द्वका कारण हरिपुर्वा नगरपालिकाको आर्थिक वर्ष ०७९/०८० को नगरसभा नै ढिलो भयो। गत मंसिरमा नगरसभा भए पनि विकासको काम अघि बढ्न नसकेको मेयर साहको भनाइ छ। हरिपुर्वा नगरपालिकाका लागि कार्यालय सहयोगी भर्ना, नगरपालिकाको भवन निर्माण गर्ने स्थान, प्रहरीचौकी निर्माणजस्ता कुरामा जनप्रतिनिधि र राजनीतिक दलहरूबीच कुरा नमिल्दा नगरपालिकाको कार्यालयमा तालाबन्दीको अवस्था आएको स्थानीय युवा वीरेन्द्र अधिकारीको भनाइ छ।
नेपाली कांग्रेस, नेकपा एमाले, जनता समाजवादी पार्टी, नेपाल (जसपा) नेपाल, नेकपा माओवादी केन्द्रसहितका पार्टीले १ सर्वदलीय संघर्ष समिति नै बनाएर नगरपालिकाको आफ्नै जमिनमा कार्यालय भवन बनाउनुपर्ने, प्रहरीचौकीका लागि खरिद गरेकै जमिनमा भवन बनाउनु पर्नेलगायतका नौ माग राखेर आन्दोलन गरेको सर्वदलीय संघर्ष समितिका संयोजक विकाउ यादवको भनाइ छ।
उनका अनुसार माग पूरा गर्न नगरपालिकाले चासो नदिएपछि संघर्ष समितिले मेयर, प्रमुख प्रशासकीय अधिकृत र लेखा अधिकृतसहित नगरपालिकाको कार्यालयमा तालाबन्दी गरिएको हो।
चैत १५ गतेदेखि नगरपालिकाको कार्यालयमा तालाबन्दी गरिएको संघर्ष समितिका संयोजक यादवको भनाइ छ। उनका अनुसार नगरपालिकाको भवन मन्दिरको जमिनमा बनाउन खोजेपछि विवाद बढेको हो। आर्थिक वर्षको अन्त्य हुनै लागेको र यो समयमा विकासको काम धमाधम गर्नुपर्नेमा नगरपालिकाको कार्यालयमा तालाबन्दी भएपछि विकास निर्माणको काम ठप्प भएको छ।
चैत १५ गते प्रमुख प्रशासकीय अधिकृत वसन्त न्यौपाने सरुवा भएपछि चैत २२ गते उपसचिव ध्रुवराज आर्चायलाई हरिपुर्वा नगरपालिकाको प्रमुख प्रशासकीय अधिकृतमा मन्त्रालयमा पठाएको भए पनि उनी आएनन्।
त्यसपछि शाखा अधिकृत शम्भु यादवलाई वैशाख १४ गते प्रमुख प्रशासकीय अधिकृतमा पठाएर उनी वैशाख १७ गते हाजिर भएको १ घण्टामै सरुवा हुनुभयो। त्यसयता रिक्त रहेको सो पदमा वैशाख २४ गते सरकारले निमेष मिश्रलाई सरुवा गर्यो तर उनी विवादका कारण आएनन्। नगरपालिकामा तालाबन्दी जारी रहेको र हाजिर हुने अवस्था नभएकाले नआएको मिश्रको भनाइ छ।
त्यसपछि जिल्ला समन्वय समिति र जिल्ला प्रशासन कार्यालयको समन्वयमा नगरपालिकाको तालाबन्दी खुलाउने प्रयास गरेको प्रमुख जिल्ला अधिकारी इन्द्रदेव यादवको भनाइ छ। जिल्ला समन्वय समिति र जिल्ला प्रशासन कार्यालयले पटक पटक तालाबन्दी खुलाउने प्रयास गरेको भए पनि सहमति नजुट्दा नगरपालिकमा लागेको तालाबन्दी जारी रहेको छ।
ताला खोल्न आफूहरू तयार रहेको भए पनि मेयर साहसहितका मानिसको अनावश्यक अडानका कारण त्यो असम्भव भएको संर्घष समिति सदस्य योगनारायण रायको भनाइ छ। उनका अनुसार संघर्ष समितिले राखेका माग पूरा गर्ने लिखित प्रतिबद्धता गर्न मेयर साह तयार नभएपछि सहमति नजुटेको हो।
यता, मेयर साहले नगरको विकासका लागि आफू लागि परे पनि संघर्ष समितिले अवरोध गरेर काम गर्न नदिएको आरोप लगाउनुभयो। उनका अनुसार कर्मचारीको तलब र सामाजिक सुरक्षा भत्ताबाहेक अन्य कुनै पनि काम भएको छैन। -रासस
