हिमाल प्रेस 
काठमाडौँ- स्वास्थ्य तथा जनसंख्या मन्त्रालयले स्वास्थ्य संस्थासम्बन्धी मापदण्ड पूर्ण रूपमा पालना गर्न पुनः ताकेता गरेको छ। मन्त्रालयले सबै सरकारी, निजी, सामुदायिक अस्पताल, प्रतिष्ठान तथा मेडिकल कलेजहरूलाई मापदण्ड पालना गर्न ताकेता गरेको हो।
यसअघि वैशाख १३ गते नै मन्त्रालयले सबै स्वास्थ्य संस्थाहरूलाई मापदण्ड पालना गर्न भनेको थियो। तर पुनः गुनासो आएको भन्दै ताकेता गरिएको मन्त्रालयले जनाएको छ।
नियमित तथा आकस्मिक अनुगमन गर्दा विपन्न, असहाय, बेवारिसे बिरामीका लागि कुल शय्याको १० प्रतिशत छुट्याई निःशुल्क गराउनुपर्नेमा नगराएको, बिरामी बडापत्र नराखेको, अस्पतालमा पार्किङको शुल्क उठाउने गरेको, जनशक्तिलाई न्यूनतम पारिश्रमिक उपलब्ध नगराएकोजस्ता गुनासो आएको मन्त्रालयले जनाएको छ।
आज (बुधबार) काठमाडौँ महानगरपालिकाका मेयर बालेन्द्र साह (बालेन)ले स्वास्थ्यमन्त्री मोहन बस्नेतलाई भेटेका थिए। सो भेटमा विपन्न नागरिकलाई उपचार खर्चमा छुट नदिने ६८ वटा स्वास्थ्य संस्थालाई कारबाही गर्न माग गरेका थिए।
