हिमाल प्रेस 
हिक्मत कार्की। फाइल तस्बिर।
विराटनगर– कोशी प्रदेशका मुख्यमन्त्री हिक्मतकुमार कार्कीले पूर्ण खोप सुनिश्चितताको निरन्तरतालाई विशेष ध्यान दिनुपर्ने बताएका छन्। विराटनगर महानगरपालिकाद्वारा आइतबार आयोजित ‘पूर्ण खोप सुनश्चितता घोषणसभा’को उद्घाटन कार्यक्रममा बोल्दै उनले यस्तो बताएका हुन्।
व्यवस्थित बसोबास नभएका कारण सहरी क्षेत्रका बालबालिकासमेत खोपको दायरामा नआएको हुनसक्ने चर्चा गर्दै उनले महानगरपालिकाले डिजिटल अभिलेखको व्यवस्थित रूपमा राखी खोपको सुनिश्चितता गर्नुपर्नेमा जोड दिए।
आजका स्वस्थ्य केटाकेटी मुलुकका भोलिका कर्णधार भएकाले उनीहरूमार्फत समाज र राष्ट्रको विकास र समृद्धिमा सघाउ पुग्ने उनको भनाइ छ। मुलुक विकासोन्मुख भएकाले यसको प्राथमिकता सडक, पुल भए पनि मानव स्वास्थ्यप्रति सरकार संवेदनशील भई आवश्यक बजेट विनियोजन गर्ने मुख्यमन्त्री कार्कीले बताए।
उनले यस क्षेत्रमा कोभिड संक्रमित वृद्धि हुन नदिन भारतसँग जोडिएका नाकाहरूमा आवश्यक सतर्कता अपनाउन प्रदेश सरकार र महानगरपालिकालले संयुक्त रूपमा एन्टिजेन र पीसीआर परीक्षणको व्यवस्थाको तयारीको व्यवस्थ सुरु गर्ने जानकारी दिए।
स्वास्थ्यमन्त्री निर्मला तावा लिम्बूले पूर्ण खोप सान्दर्भिक र आवश्यक भएको चर्चा यसले अन्य पालिकालाई प्रेरणा दिने विश्वास व्यक्त गरिन्। जिल्ला समन्वय समिति मोरङका प्रमुख अजम्बर राईले खोपको अभिलेख नगर र वडामा राख्नु पर्नेमा जोड दिँदै यो कार्यको निरन्तरता आवश्यक रहेको चर्चा गरे।
विराटनगर महानगरपालिका प्रमुख नागेश कोइरालाले पूर्ण खोप सुनिश्चिततामा स्वास्थ्य स्वयम्सेविका, जनप्रतिनिधिहरूको महत्त्वपूर्ण भूमिका रहेको धारणा राखे।
सभामा उपप्रमुख शिल्पा निराला कार्की, बर्जु गाउँपालिकाका अध्यक्ष जीवछ राय, स्वास्थ्य तथा जनसंख्या मन्त्रालयका सचिव डा. रोशन पोखरेल र महानगरका कार्यकारी अधिकृत विष्णुप्रसाद कोइरालाले खोप सेवा प्राप्त गर्नु बालबालिका र नागरिकको नैसर्गिक अधिकारी भएको स्पष्ट पारे।
सो अवसरमा मुख्यमन्त्री कार्कीले महानगरप्रमुख कोइराला एवम् १९ वडा अध्यक्षहरूलाई खोप सुनिश्चितताको प्रमाणपत्र दिए। उनले खोप सुनिश्चतता प्रतिबद्धता पत्रमासमेत हस्ताक्षर गरेको थियो।
महानगरपालिमा रहेका १६ देखि ५९ महिनाका १७ हजार ५ सय २ बालबालिकामध्ये खोप लगाउन छुट भएका एक हजार ५ सय ९२ लाई पूर्ण खोप गरिसकेको र आगामी दिनमा कुनै बालबालिका खोपबाट वञ्चित नहुन ‘खोप सुनिश्चिता घोषणा’ गरिएको हो। महानगरले १३ वटा विभिन्न खोपहरू ३५ विभिन्न वडा कार्यालय, स्वास्थ्य केन्द्रमार्फत निःशुल्क रूपमा प्रदान गर्दै आएको छ।
