हिमाल प्रेस 
काठमाडौँ- भारतीय अभिनेत्री राधिका आप्टे अभिनीत फिल्म ‘मिसेज अन्डरकभर’को टिजर सार्वजनिक भएको छ। उम्दा अभिनयका लागि हिन्दी सिनेमामा छुट्टै पहिचान बनाउन सफल उनको नयाँ अवतार देखेर प्रशंसक खुसी छन्।
फिल्मको टिजरले सकारात्मक प्रतिक्रिया पाइरहेको छ। यसअघि पनि प्रहरीको भूमिका निर्वाह गरिसकेकी उनले यसपटक भने फिल्ममा एक्सन पनि गर्नेछिन्। टिजरको सुरुमा उनी गृहिणीका रूपमा देखिएकी छिन्। सारी लगाएकी उनलाई उट्पट्याङ काम गर्दै गरेको देखाइएको छ। एक जना उनको श्रीमान्लाई सोध्छन्, ‘म्याडम के गर्नुहुन्छ?’
‘केही गर्दिनन्, उनी गृहिणी हुन्’ राधिकाका श्रीमान्का उत्तर हुन्छ। उनी अन्डरकभर एजेन्ट भएको श्रीमान्लाई पनि थाहा छैन भन्ने कुरा टिजरमा देख्न सकिन्छ। टिजरमा एक छिनपछि राधिकालाई अर्कै अवतारमा देख्न सकिन्छ। उनी गुण्डाहरूलाई कुटिरहेकी छन्। एक्सन गरिरहेकी छन्।
उनको त्यो रूप देखेर प्रशंसक छक्क छन्। कतिपयले उनलाई ‘फिमेल फ्यामिली म्यान’ भनिरहेका छन्। फिल्ममा राधिकासँगै राजेश शर्मा र सुमित व्यास देखिनेछन्। ओटीटी प्लेटफर्म जी फाइभमा रिलिज हुने फिल्मको प्रदर्शन मिति घोषणा गरिएको छैन।
