नेपाल र भारतबीचको सांस्कृतिक सम्बन्ध पुन: परिभाषित गर्न माग

हिमाल प्रेस ६ मंसिर २०८३ १८:०९ | Sunday, November 22, 2026
नेपाल र भारतबीचको सांस्कृतिक सम्बन्ध पुन: परिभाषित गर्न माग

काठमाडौँ- नेपाल र भारतबीचको सांस्कृतिक सम्बन्ध पुनः परिभाषा गरिनुपर्नेमा जोड दिइएको छ।नेपाल–भारत नीति विमर्शअन्तर्गत आइतबार भएको एसियन सांस्कृतिक सम्पदा विषयक प्रस्तुतिका क्रममा दुवै देशका संस्कृतिसम्बद्ध निकाय एवं सरोकारवालाले यस विषयमा जोड दिएका हुन्।

इन्डिया फाउण्डेशनकी रमी नीरञ्जन देसाईंले नेपाल र भारतबीच सांस्कृतिक सम्बन्धको पुनः परिभाषा जरुरी रहेको बताइन्। उनले नयाँ पुस्तामा देखिएको नयाँ सोच र आकांक्षाले दुवै देशका युवालाई प्रभावित बनाइरहेको सन्दर्भमा नीतिहरुमा पनि आवश्यकता अनुसारको परिवर्तनमा जोड दिइन्।

नेपालका शोधकर्ता अशोक राई प्यासीले पुस्तान्तरणका क्रममा संस्कृतिको पनि हस्तान्तरण हुने भएकाले युवाहरुलाई स्वसंस्कृतिका बारेमा जानकार बनाउनुपर्ने बताए। युवाहरुलाई सृजनशील र दक्ष बनाउन नेपाल तथा भारतले मिलेर कार्य गर्न सक्ने उनको भनाइ थियो।

कार्यक्रममा भारतको केन्द्रीय संस्कृत विश्वविद्यालयका प्रा. श्रीनिवास बरखेडीले नेपाल र भारतबाट सुरु भई अहिले पनि अभ्यास एवं साधनामा रहेको संस्कृतिले समग्र एसियालाई प्रकाशित गरिरहेकाले यसको विशुद्धता कायम राख्नुपर्नेमा जोड दिए।

भारतकी प्रा. माधुरी सुखिजाले नेपाल र भारतबीच सांस्कृतिक, शैक्षिक, खेलकुद जस्ता सम्बन्धलाई संस्थागत गर्नुपर्नेमा जोड दिइन्। कार्यक्रममा उनले संयुक्त शैक्षिक कार्यक्रमहरु बनाएर जानुपर्ने बताइन्।

काठमाडौँ विश्वविद्यालयका लागि आईसीसीआर प्रमुखसमेत रहेकी प्रा. सुखिजाले शिक्षा र खेलकुदका क्षेत्रमा भइरहेका सहकार्यहरुले सम्बन्धलाई अझ प्रगाढ बनाएको बताइन्।

विश्वमा आएको प्रविधिको तीव्र विकासले नेपाल र भारतबीचको नयाँ पुस्तामा सम्बन्धलाई सुदृढीकरणका लागि नयाँ नीतिहरु आवश्यक देखिएको उनले बताइन्।

भारतको मौलाना अबुल कलाम आजाद इन्स्टिच्युट अफ एशियन स्टडिजका निर्देशक प्रा. सरुपप्रसाद घोषले दुवै देशले युवाहरुमा रोजगारी र दक्षतामा ध्यान दिनुपर्ने बताए।

भारतको वर्तमान सरकार दक्षता अभिवृद्धिमा केन्द्रित भएको तर ब्रेन ड्रेन र बसाईँसराईँको चुनौती बढेको उनले सुनाए। सामाजिक क्षेत्रमा आएका समस्याले युवा पुस्तामा आएका नकारात्मक असर अन्त्यका लागि नीति बनाएर अघि बढ्नुपर्नेमा उनको जोड थियो।

भारतको विद्यान गंगा बेसिन फाउण्डेशन अफ रिसर्च एण्ड सस्टेनेबल पोलिसीका निर्देशक आनन्दकुमार श्रीवास्तवले नेपाल र भारतसँग ४० प्रतिशतभन्दा बढी युवा जनसंख्या रहेकोले त्यसबाट प्रचुर लाभ लिन सक्नुपर्ने बताए। युवाहरुमा आएको ब्रेन ड्रेनको चुनौती दुवै देशको चुनौती भएकाले मिलेर सामना गर्नुपर्ने उनको भनाइ थियो।

प्रकाशित: ६ मंसिर २०८३ १८:०९ | Sunday, November 22, 2026

प्रतिक्रिया

Leave a Reply

Your email address will not be published. Required fields are marked *

three + eight =


© Nepali horoscope

© Gold Price Nepal

© Nepal Exchange Rates
© Nepal weather forecast