हिमाल प्रेस 
पोखरा- मंसिर ४ मा सम्पन्न आम निर्वाचनमा गण्डकी प्रदेशसभामा हालसम्म सार्वजनिक १५ निर्वाचन क्षेत्रको अन्तिम मतपरिणाममा कांग्रेसले १० सिट जितेको छ। यस्तै, नेकपा एमालेले ३ सिट जितेर दोस्रो स्थानमा छ।
पाँचदलीय गठबन्धनको अर्को दल माओवादी केन्द्रले १ र स्वतन्त्रले १ सिट जितेका छन्। कांग्रेसले बागलुङ जिल्लाका ४ वटै निर्वाचन क्षेत्र, मुस्ताङका दुईवटै निर्वाचन क्षेत्र, गोरखाका २, तनहुँ र मनाङका १-१ क्षेत्रमा चुनाव जितेको छ। एमालेले कास्कीमा २ र तनहुँमा १ क्षेत्र जितेको छ। माओवादीले म्याग्दी र स्वतन्त्रले मनाङमा चुनाव जितेका छन्।
गोरखा क्षेत्र नम्बर १ (ख) मा कांग्रेसका नन्दप्रसाद न्यौपाने, २ (ख) मा सुरेन्द्रराज पाण्डे विजयी भए। बागलुङ १ (क) मा दीपेन्द्रबहादुर थापा, १ (ख) मा डिल्लीराम सुवेदी, २ (क) मा जित शेरचन र २ (ख) मा दोर्णकुमार कुँवर निर्वाचित भएका छन्।
हिमालपारिका जिल्लाहरु मुस्ताङ (क) मा नम्डु गुरुङ, (ख) मा विकल शेरचन तथा मनाङ (क) मा मुनिन्द्रजंग गुरुङ र (ख) मा राजीव गुरुङ उर्फ दीपक मनाङे सर्वसम्मत भइसकेका छन्। तनहुँ २ (ख) मा कांग्रेसकै जीतप्रकाश आले निर्वाचित भए।
कास्की क्षेत्र १ (२) मा एमालेका वेदबहादुर गुरुङ श्याम, कास्की २ (ख) मा एमालेका भीम कार्कीले चुनाव जितेका छन् भने तनहुँ २ (क)बाट एमालेकै श्यामराजा महत निर्वाचित भए।
एकमात्र सिट जितेको माओवादी केन्द्रको तर्फबाट रेशम जुग्जाली म्याग्दी (ख) बाट निर्वाचित भए। गण्डकीमा पाँचदलीय गठबन्धनका उम्मेदवार विरुद्ध एमालेले कडा टक्कर दिएको छ।
