हिमाल प्रेस 
काठमाडौँ- धितोपत्र बजारमा शेयर कारोबार मापक नेप्से परिसूचक आज दोहोरो अंकले घटेको छ। नेपाल स्टक एक्सचेञ्जका अनुसार नेप्से परिसूचक १९ दशमलव ६७ अंकले ओरालो लागेर दुई हजार ६०१ दशमलव ९२ को विन्दुमा पुगेको हो।
ठूला कम्पनीको कारोबार मापन गर्ने सेन्सेटिभ परिसूचक दुई दशमलव ४९ अंकले ओरालो लागेर चार सय ५४ दशमलव १९ मा पुगेको छ।
त्यस्तै फ्लोट सूचक एक दशमलव २१ अंकले घटेर एक सय ७८ दशमलव ६८ मा पुगेको छ। साथै सेन्सेटिभ फ्लोट सूचक भने शून्य दशमलव ९२ अंकले घटेर एक सय ५३ दशमलव ६७ मा पुगेको छ।
आज विभिन्न कम्पनीका ८७ लाख ५१ हजार ३८० कित्ता शेयर चार अर्ब ६१ करोड १९ लाख ५४ हजार ७८२ मूल्यमा खरिद बिक्री भएको छ। आज १३ वटै उपसमूह घटेका छन्। आज ४२ कम्पनीको शेयर मूल्य बढ्यो भने दुई सय २९ कम्पनीको शेयर घटेको छ।
नेप्सेका अनुसार उपकार लघुवित्त वित्तीय संस्था, स्नो रिभर लिमिटेड र कुमारी सबल योजनाका लगानीकर्ताले आज कमाएका छन् भने विओके डिबेञ्चर, सल्पा विकास बैंक, थ्रिस्टार हाइड्रोपावर कम्पनीका लगानीकर्ताले गुमाएका छन्।
