हिमाल प्रेस 
काठमाडौँ- नेपालयको ‘आर’शालामा दार्जिलिङका प्रसिद्ध गायक तथा संगीतकार पवन गोले र रमेश गुरुङको सांगीतिक ‘पलेँटी’ सम्पन्न भएको छ । यसपालिको पलेँटीमा गायक पवन गोलेले नयाँ पुराना गरी १६ वटा गीत प्रस्तुत गरेका थिए । विभिन्न संगीतकारका धुन समेटिएको सो कार्यक्रममा आठ वटा गीतमा भने संगीतकार रमेश गुरुङका एकल धुन रहेका थिए ।
कार्यक्रममा प्रस्तुत हुने क्रममा पवनले आजभन्दा १४ वर्षअघि पहिलो पल्ट पलेँटीमा प्रस्तुत भएको सम्झना गरे । संगीतकार रमेश गुरुङ पनि आजभन्दा २० वर्ष पहिले पलेँटीमा संलग्न भएका कलाकार हुन् । सन् २००६ मा रमेशले अग्रज कण्ठ शिल्पी दावा ग्याल्मोलाई हार्मोनियममा साथ दिएर पलेँटी कसेका थिए ।
कार्यक्रमको थालनी कवि तथा गीतकार दिनेश अधिकारीको शब्द रहेको ‘माटो मात्र देश होइन’बाट गरिएको थियो । दिवङ्गत सङ्गीतकार दिव्य खालिङले धुन भरेको गीतमा सांस्कृतिक सिमाना देश सिमानाभन्दा बाहिर पनि फैलिएको हुन्छ भन्ने भाव बोकेको थियो।
सधैँ झैँ यसपालि पनि कार्यक्रमको सञ्चालन पलेँटीका संयोजक तथा गायक सङ्गीतकार आभासले गरेका थिए । उनले कार्यक्रमलाई दुई चरणमा विभाजन गरेर प्रस्तुत गरेका थिए।
कार्यक्रमको पहिलो चरणमा सङ्गीतकार रमेश गुरुङले धुन भरेका गीतहरू प्रस्तुत गरिएका थिए । त्यस क्रममा गीतकार मधुकर बल, नरदेन रुम्बा, सञ्जय बान्तवा, सञ्जय विष्ट, पुरन गिरी, कालुसिंह रनपहेली, जस योन्जन प्यासी, नगेन्द्र खड्का र जितेन्द्र बर्देवाका शब्दहरू समेटिएका थिए । सङ्गीतकार रमेश गुरुङले धुन भरेका आठ वटा गीतमा शैलीको विविधता झल्कन्थ्यो । उनले नेपाली आधुनिक संगीतमा अपनाइने शास्त्रीय, लोक र समसामयिक तीन वटै शैलीलाई आफ्नो सृजनाको आधार बनाएको झल्को पाइन्थ्यो ।
कार्यक्रमको दोस्रो चरणमा पवन गोलेको स्वरमा रेकर्ड भएर लोकप्रिय बनेका गीतका साथै केही नयाँ गीत पनि प्रस्तुत गरेका थिए । दोस्रो चरणको आरम्भमा पवन गोलेका पहिलो सङ्गीतकार सुवर्ण लिम्बुका दुई धुनहरू समेटिएका थिए ।
दोस्रो चरणको दोस्रो प्रस्तुतिमा गीतकार अरुण तिवारीको ‘मलाई थाहा छैन’ बोलको गीत रहेको थियो । जुन गीतलाई पवनले केही दिन पहिले मात्र सङ्गीतकार सुवर्ण लिम्बुबाट प्राप्त गरेर सिकेको जानकारी गराए । त्यस चरणमा प्रस्तुत भएका थप गीतहरूमा ‘कहीँ तिमीलाई’, ‘कति संगालेँ’, ‘भत्किएको महल’, ‘कहाँ दिन खुल्छ’ बोलका गीतहरू रहेका थिए । उल्लेखित गीतहरू क्रमशः नरदेन रुम्बा, अशोक गुरुङ, पारस गजमेर र प्रमोद स्नेहीले सृजना गरेका शब्दहरू हुन् । सङ्गीतकार बसन्त छेत्री, पवन गोले, पारस गजमेर र प्रदीप छेत्रीले धुन भरेका गीतहरूको प्रस्तुतिपछि कार्यक्रमले अन्तिम चरण प्रवेश गरेको थियो ।
कार्यक्रमको समापन पवन गोलेको अत्यधिक लोकप्रिय गीत ‘हावासँगै बगुँ भन्छ’ बाट भएको थियो । सङ्गीतकार सुवर्ण लिम्बुले नै धुन भरेको यस गीतलाई अग्रज गीतकार शिवशंकर थापाले सिर्जना गरेका हुन् । आगामी महिनाको पलेँटीमा उनै गीतकार शिवशंकर थापालाई निम्त्याइएको छ।
