वैदेशिक रोजगारीका लागि हिँडेका युवा त्रिभुवन अन्तर्राष्ट्रिय विमानस्थलमा। फाइल तस्बिर : सेन्टर फर द स्टडी अफ लेबर एन्ड मोबिलिटी
काठमाडौँ- चालु आर्थिक वर्ष २०८२/८३ को पहिलो नौ महिनामा वैदेशिक रोजगारीका लागि बिदेसिने नेपाली युवाको संख्या सामान्य रूपमा घटेको छ।
वैदेशिक रोजगार विभागका अनुसार समीक्षा अवधिमा नयाँ र नवीकरणसहित कुल ५ लाख ८७ हजार ३४० जना नेपालीले श्रम स्वीकृति लिएका छन्। यो संख्या अघिल्लो आर्थिक वर्षको सोही अवधिमा जारी गरिएको ६ लाख ७ हजार ८७४ अनुमतिभन्दा कम हो। पश्चिम एसियामा जारी द्वन्द्वका कारण रोजगारीका लागि ती मुलुकतर्फ जाने नेपाली युवाको संख्या घटेको हो।
महिनागत तथ्यांकले अवधिभर उतारचढाव देखाउँछ। साउनमा ६८ हजार ११० जना वैदेशिक रोजगारीका लागि गएका थिए भने भदौमा ६७ हजार ९७२, असोजमा ६४ हजार ६३४ र कात्तिकमा ७३ हजार ९४ जना बिदेसिएका छन्।
मंसिरमा ६५ हजार ७०५, पुसमा ६२ हजार ५५९, माघमा ७० हजार ५०३, फागुनमा ५२ हजार ९४४ र चैतमा ६१ हजार ८१९ जना बिदेसिएका छन्।
चैतमा वैदेशिक रोजगारीका लागि जाने युवाको संख्या अघिल्लो आर्थिक वर्षको सोही महिनाको तुलनामा १५.७८ प्रतिशतले घटेको छ। गत वर्ष सोही महिनामा ७३ हजार ४०३ जनाले श्रम स्वीकृति लिएका थिए। त्यस्तै, फागुनमा पनि अघिल्लो वर्षको सोही महिनाको तुलनामा करिब १६ हजारले श्रम स्वीकृति कम जारी गरिएको छ।
फेब्रुअरी अन्तिम साता इरानमाथि भएको इजरायल-अमेरिकाको आक्रमणपछि श्रम स्वीकृति लिने युवाको संख्या घट्दै गएको छ। उक्त आक्रमण चाँडै पश्चिम एसियामा व्यापक संकटका रूपमा विकसित भयो। खाडी राष्ट्रहरू नेपाली श्रमिकका प्रमुख गन्तव्य भएकाले संयुक्त अरब इमिरेट्स (यूएई), कतार, साउदी अरेबिया, कुवेत र ओमानजस्ता देशतर्फ जाने तयारीमा रहेका युवामा यस संकटले प्रत्यक्ष प्रभाव पारेको छ।
विदेशमा कार्यरत श्रमिकहरूले पठाउने विप्रेषण (रेमिट्यान्स) लामो समयदेखि नेपाली अर्थतन्त्रको प्रमुख आधार रहँदै आएको छ। आर्थिक वर्ष २०८१/८२ मा कुल रेमिट्यान्स आप्रवाह १७ खर्ब २३ अर्ब २७ करोड रुपैयाँ पुगेको थियो। चालु आर्थिक वर्षको पहिलो आठ महिनामै १४ खर्ब ४९ अर्ब ६५ करोड रुपैयाँ भित्रिइसकेको छ। तर वैदेशिक रोजगारीका लागि बिदेसिने युवाको संख्या घट्दा रेमिट्यान्समा असर पर्ने निश्चित छ।
पश्चिम एसियामा द्वन्द्व चर्किँदै जाँदा सरकारले साउदी अरेबिया, यूएई, कतार, कुवेत, बहराइन, ओमान, इराक, यमन, जोर्डन, लेबनान, टर्की र इजरायल गरी १२ देशका लागि श्रम स्वीकृति जारी गर्न स्थगित गरेको थियो। अहिले भने साउदी अरेबिया, यूएई, कतार, ओमान, यमन, जोर्डन र टर्की गरी सात देशका लागि नवीकरण स्वीकृति पुनः सुरु गरिएको भए पनि सबै १२ देशका लागि नयाँ श्रम स्वीकृति अझै स्थगित छ।
