हिमाल प्रेस 
काठमाडौँ- नेपाली फिल्मका चर्चित खलनायक वरिष्ठ कलाकार सुनिल थापाको निधन भएको छ। उनको निधनसँगै नेपाली फिल्मले चर्चित फिल्मकर्मी र कुशल कलाकार गुमाएको हो। ‘राते काइँला’ नामले चर्चित थापाको आज बिहान थापाथलीस्थित नर्भिक अस्पतालमा हृदयाघातका कारण निधन भएको हो। लामो समयदेखि नेपाली, भारतीय र भोजपुरी चलचित्र उद्योगमा सक्रिय थापा शंखमुलस्थित अपार्टमेन्टमा एक्लै बस्दै आएका थिए, जबकि उनका परिवारका अन्य सदस्यहरू भारतको मुम्बईमा बसोबास गर्थे।
थापाको जन्म नेपालको दाङ जिल्लामा सन् १९६० मे १९ मा भएको थियो। थापालाई नेपाली सिनेमामा ‘राते काइँला’ नामले चिनिन्थे, जुन उनको आइकॉनिक फिल्म ‘चिनो’ मा खेलेको भूमिकाबाट उक्त उपमा प्राप्त भएको हो। यो भूमिकाले उनलाई नेपाली सिनेमाको ‘सुपर भिलेन’ बनायो, जसले खलनायकलाई पनि नायकसरह सम्मान दिलाउन सफल भएको थियो।
उनले नेपाली सिनेमामा ‘चिनो’, ‘राँको’, ‘सपना’, ‘देउकी’, ‘ठूल्दाइ’, ‘आगो’, ‘तन त सरै बिग्रिस नि बद्री’ जस्ता हिट फिल्महरूमा काम गरे। भारतीय सिनेमामा पनि थापाको योगदान उत्तिकै महत्वपूर्ण छ । ‘एक दूजे के लिए’ पछि उनी ‘मानव हत्या’, ‘अलबेला’ र ‘मेरी कोम’ जस्ता फिल्महरूमा देखिए। ‘मेरी कोम’ मा उनको भूमिका प्रियंका चोपडासँग थियो, जसले उनलाई अन्तर्राष्ट्रिय स्तरमा थप चर्चा दिलाएको थियो । भोजपुरी सिनेमामा पनि सक्रिय थापाले ‘शपथ’ र ‘पाथु एनरथुकुल्ला’ जस्ता फिल्महरूमा काम गरेका थिए।
थापाको व्यक्तिगत जीवन सरल थियो । उनका छोरा अन्मोल थापा र छोरी प्रेशियस थापा मुम्बईमा भएपनि, उनी भने नेपालमै बस्न रुचाउँथे। उनी कला जगतमा ‘शेर सिंह’ वा ‘दिनेश लामिछाने’ नामले पनि चिनिन्थे। उनी पछिल्लो ताका ‘नाम नाम सत्य’को काममा व्यस्त थिए।
