हिमाल प्रेस 
काठमाडौँ– राष्ट्रव्यापी विरोध प्रदर्शनमाथि इरानले गरेको ‘दमन’ का कारण संयुक्त राज्य अमेरिकासँग तनाव तीब्र बन्दै गएपछि बिहीबार व्यावसायिक उडानहरूका लागि हवाई क्षेत्र बन्द गरेको छ। इरानले स्पष्ट करण नखुलाई हवाई क्षेत्र घन्टौँका लागि बन्द गरेको हो।
प्रमुख पूर्व–पश्चिम अन्तर्राष्ट्रिय उडान मार्गमा पर्ने इरानले जारी गरेको पाइलट मार्गनिर्देशनअनुसार यो बन्द चार घण्टाभन्दा बढी समयसम्म कायम रह्यो। यस अवधिमा अन्तर्राष्ट्रिय विमान कम्पनीहरूले इरानको आकाश मार्ग प्रयोग नगरी उत्तर र दक्षिणतर्फ उडान डाइभर्ट गरे। पछि बन्द अवधि समाप्त भएको संकेत दिइएपछि बिहान ७ बजेपछि धेरैजसो आन्तरिक उडानहरू पुनः सञ्चालनमा आएका थिए।
यसअघि पनि इरानले जुन महिनामा इजरायलसँग भएको १२ दिने युद्ध तथा इजरायल–हमास युद्धका क्रममा इजरायलसँगको गोलीबारीपछि आफ्नो हवाई क्षेत्र बन्द गरेको थियो। तर यसपटक कुनै प्रत्यक्ष सैन्य भिडन्तको स्पष्ट संकेत नदेखिए पनि इरान विश्वव्यापी उड्डयनका लागि अत्यन्तै महत्त्वपूर्ण मार्गमा पर्ने भएकाले बन्दको असर तुरुन्तै अन्तर्राष्ट्रिय स्तरमा देखिएको हो।
‘धेरै एयरलाइन्सहरूले पहिले नै आफ्ना सेवाहरू घटाइसकेका वा निलम्बन गरेका छन् र अधिकांश क्यारियरहरूले इरानी हवाई क्षेत्रबाट जोगिन थालेका छन्,’ द्वन्द्व क्षेत्र र हवाई यात्रासम्बन्धी जानकारी प्रदान गर्ने वेबसाइट सेफएयरस्पेसले भनेको छ, ‘यस अवस्थाले थप सुरक्षा वा सैन्य गतिविधिको संकेत गर्न सक्छ, जसमा मिसाइल प्रक्षेपण वा हवाई प्रतिरक्षा प्रणालीको गतिविधि बढ्ने जोखिम रहन्छ। यस्तो परिस्थितिले नागरिक विमानलाई गलत रूपमा लक्ष्य ठानिने खतरा पनि बढाउँछ।’
विगतमा इरानले व्यावसायिक विमानलाई शत्रुतापूर्ण लक्ष्यका रूपमा गलत पहिचान गरेको उदाहरण पनि छ। सन् २०२० मा इरानी हवाई प्रतिरक्षाले युक्रेन इन्टरनेसनल एयरलाइन्सको फ्लाइट पिएस ७५२ लाई दुई सतह–देखि–हावा मिसाइल प्रहार गर्दा विमानमा सवार सबै १७६ यात्रु र चालक दलका सदस्यहरूको ज्यान गएको थियो। त्यसबेला इरानले केही दिनसम्म उक्त आरोप अस्वीकार गर्दै पश्चिमी प्रचारको संज्ञा दिएको थियो, तर पछि विमान आफ्नै प्रतिरक्षाले खसालेको स्वीकार गर्न बाध्य भएको थियो।
यस पटकको हवाई क्षेत्र बन्द कतारमा रहेको एक प्रमुख अमेरिकी सैन्य आधारका केही कर्मचारीहरूलाई खाली गर्न सल्लाह दिइएपछि गरिएको हो। कुवेतस्थित अमेरिकी दूतावासले पनि आफ्ना कर्मचारीहरूलाई खाडी क्षेत्रका केही सैन्य आधारहरूमा जान ‘अस्थायी रूपमा रोक्न’ निर्देशन दिएको छ।
यसैबीच, संयुक्त राज्य अमेरिकाको अनुरोधमा संयुक्त राष्ट्रसंघीय सुरक्षा परिषद्ले बिहीबार दिउँसो इरानको अवस्थाबारे आपतकालीन बैठक बोलाएको छ।
अमेरिकी राष्ट्रपति डोनाल्ड ट्रम्पले बुधबार दिएका अस्पष्ट अभिव्यक्तिहरूले इरानविरुद्ध सम्भावित अमेरिकी कदमबारे अनिश्चितता बढाएको छ। पत्रकारहरूसँग कुरा गर्दै उनले धेरै विवरण नदिई इरानमा मृत्युदण्डसम्बन्धी योजना रोकिएको जानकारी आफूलाई प्राप्त भएको बताए।
इरानी विदेशमन्त्री अब्बास अराघचीले भने तनाव घटाउने प्रयास गर्दै संयुक्त राज्य अमेरिकालाई वार्ताको माध्यमबाट समाधान खोज्न आग्रह गरेका छन्।
अमेरिका र इरानको स्वरमा आएको यो परिवर्तन इरानी न्यायपालिकाका प्रमुखले हिरासतमा रहेका हजारौँ व्यक्तिहरूलाई छिट्टै सजाय दिन सरकार अघि बढ्नुपर्ने बताएको केही घण्टापछि भएको हो। मानव अधिकारकर्मीहरूले कैदीहरूको फाँसी चाँडै हुनसक्ने गम्भीर चेतावनी दिएका छन्।
अमेरिकामा आधारित मानव अधिकार कार्यकर्ता समाचार एजेन्सीका अनुसार प्रदर्शनका क्रममा सुरक्षाबलको दमनबाट हालसम्म कम्तीमा दुई हजार ६१५ जनाको मृत्यु भइसकेको छ। यो संख्या दशकौँयताकै सबैभन्दा ठूलो मानवीय क्षति मानिएको छ, जसले सन् १९७९ को इस्लामिक क्रान्तिका बेला देखिएको अराजकतालाई स्मरण गराउँछ।-रासस/एपी
