हिमाल प्रेस 
काठमाडौँ- पूर्वराष्ट्रपति विद्यादेवी भण्डारीले ३०४औँ पृथ्वी जयन्ती तथा राष्ट्रिय एकता दिवसका अवसरमा स्वदेश तथा विदेशमा रहेका सम्पूर्ण नेपालीमा हार्दिक शुभकामना व्यक्त गरेकी छन्।
आइतबार एक शुभकामना सन्देश जारी गर्दै उनले नेपाल एकीकरण अभियानका नायक पृथ्वीनारायण शाहप्रति श्रद्धासुमन अर्पण गरेकी हुन्।
भण्डारीले साना राज्यहरूको एकीकरणबाट आधुनिक नेपालको निर्माण हुनु इतिहासको गौरवपूर्ण अध्याय भएको उल्लेख गरेकी छन्। उनले आफ्नो सन्देशमा नागरिकको सल्लाह र सुझाव लिएर एकीकरण प्रक्रियालाई जनआधारित राष्ट्रिय अभियान बनाउने पृथ्वीनारायण शाहको दूरदर्शी नेतृत्व र पुर्खाहरूको त्यागका कारण नै नेपालको स्वतन्त्र अस्तित्व जोगिएको बताएकी छन्।
ऐतिहासिक एकीकरणकै आधारभूमिमा उभिएर आजको सार्वभौम, स्वतन्त्र र लोकतान्त्रिक गणतन्त्र नेपालसम्म आइपुगेको भन्दै उनले पुर्खाहरू प्रति कृतज्ञ हुनुपर्नेमा जोड दिएकी छन् । इतिहासका सकारात्मक शिक्षाबाट आजको पुस्ताले मार्गदर्शन लिनु नै सभ्य समाजको पहिचान भएको उनको भनाइ छ।
पूर्वराष्ट्रपति भण्डारीले पृथ्वीनारायण शाहका दिव्य उपदेशहरू राष्ट्रिय, आत्मनिर्भर र स्वावलम्बी अर्थतन्त्रका साथै सन्तुलित परराष्ट्र नीतिका सन्दर्भमा आज पनि उत्तिकै सान्दर्भिक रहेको चर्चा गरेकी छन् ।
राष्ट्रिय एकता दिवसले देशभक्तिको भावना सबल बनाई सामाजिक सदभाव र राष्ट्रिय एकतालाई अझ सुदृढ बनाउने विश्वास उनले व्यक्त गरेकी छन् । साथै यस दिवसले राष्ट्रिय स्वाभिमान, स्वतन्त्रता र समृद्धिका लागि सबैलाई प्रेरणा प्रदान गरोस् भन्ने कामना समेत उनले गरेकी छन् ।
