हिमाल प्रेस 
जनकपुरधाम- जनकपुरधामकी रोशनी झाको हत्या आरोपमा प्रहरीले उनका ससुरालाई पक्राउ गरेको छ। माइतीपक्षले रोशनीको हत्या भएको आरोप लगाएपछि प्रहरीले उनका ससुरा रुद्रनारायण मिश्रलाई नियन्त्रणमा लिएको हो।
जनकपुरधाम–४ कटैयाचौरीस्थित ससुरालीमा २७ वर्षीया रोशनीको शंकास्पद मृत्यु भएको थियो।
रोशनीको माइतीपक्षले श्रीमान प्रशान्त मिश्र, ससुरा रुद्रनारायणलगायतका आफन्तले हत्या गरेको आरोप लगाएको छ। ससुरालीपक्षले भने भ¥याङबाट लडेर सिकिस्त भएकी रोशनीको उपचारको क्रममा मृत्यु भएको दाबी गरेको छ।
बिहीबार राति रोशनी भर्याङबाट खसेकी र उपचारका लागि गोदाबरी अस्पताल लग्दा चिकित्सकले मृत घोषणा गरेको थियो। माइतीपक्षले जानकारी लिन खोज्दा रोशनीले पासो लगाएर आत्महत्या गरेको भन्दै ससुरालीपक्ष पन्छिन खोजेको बताइएको छ।
रोशनीको घाँटी थिचेर हत्या गरिएको र प्रमाण नष्ट पार्न कपडा तथा अन्य सामान जलाइएको दाबी गर्दै माइतीपक्ष न्याय दिलाउन प्रहरीसँग माग गरेकी छन्। घटनास्थलमा जलाइएका अवशेषहरू फेला परेको र आरोपीहरूले पटक–पटक अभिव्यक्ति परिवर्तन गरेको रोशनीका मामा पंकज झाले बताएका छन्।
रोशनीको शंकास्पद मृत्युपछि धनुषाका प्रहरी प्रमुख रुगमबहादुर कुँवर आफैँले घटनास्थलको निरीक्षण गरेका छन्। उनले रोशनीको मृत्यु शंकास्पद रहेको बताए। उनले घटनाबारे थप अनुसन्धान भइरहेको जानकारी दिए।
प्रहरीको प्रारम्भिक अनुसन्धानले घटनालाई शंकास्पद मानेको छ। पीडित परिवारले रोशनीका श्रीमान प्रशान्त, डा.धिरज झा, प्रशान्तकी बहिनी र भिनाजुले प्रमाण नष्ट गर्न भूमिका खेलेको आरोप लगाएका छन्।
चौतर्फी दबाबपछि घटनास्थल पुगेका एसपी कुँवरले घरमै रहेका रोशनीको ससुरा रुद्रनारायणलाई पक्राउ गरेको हो। प्रहरीले किटानी जाहेरी लिन पनि अस्वीकार गरेको थियो। तर, एसपी कुँवरले घटनास्थल पुगेपछि आइतबार किटानी जाहेरी पनि दर्ता भएको छ।
