नेपाल प्रहरीमा १६ सय जनाको भर्ना खुला, असोज १९ देखि दरखास्त दिन सकिने

काठमाडौँ- नेपाली प्रहरीले झण्डै १६ सय जनाको नयाँ भर्ना खुला गरेको छ। प्रहरी प्रधान कार्यालयले शुक्रबार सूचना जारी गर्दै विभिन्न पदमा दरखास्त आह्वान गरेको हो।

जारी सूचनाअनुसार प्रहरी जवान पदमा १,५५३ जना, कार्यालय सहयोगीका रूपमा हजाम ११ जना, कुचीकार १५ जना र खेलकुद तर्फ १५ जना गरी कुल १,५९४ जनाका लागि दरखास्त माग गरिएको छ।

प्रहरी जवान पदका लागि न्यूनतम शैक्षिक योग्यता आठ कक्षा उत्तीर्ण हुनुपर्ने छ भने कार्यालय सहयोगीका लागि साधारण लेखपढ जान्न सक्ने हुनुपर्ने योग्यता तोकिएको छ।

इच्छुक र योग्य नेपाली नागरिकले असोज १९ गतेदेखि कात्तिक २८ गतेसम्म तोकिएको केन्द्रमा स्वयम् उपस्थित भई दरखास्त दिन सक्नेछन्।

जवान, हजाम र कुचीकार पदका लागि दरखास्त सातै प्रदेशका प्रदेश प्रहरी कार्यालय, सबै जिल्ला प्रहरी कार्यालय तथा काठमाडौँ उपत्यकाका तीन वटै जिल्लाका प्रहरी परिसरहरूमा बुझाउन सकिनेछ। खेलाडी पदका लागि भने राष्ट्रिय प्रहरी प्रशिक्षण प्रतिष्ठान, महाराजगन्ज काठमाडौँमा दरखास्त दिनुपर्ने छ।

दरखास्त दस्तुर जनपद (जवान) तर्फ तीन सय रूपैयाँ र एकभन्दा बढी समूहमा आवेदन दिएको खण्डमा प्रति समूह ६० रूपैयाँ थप लाग्नेछ। खेलाडी तर्फ दस्तुर दुई सय रूपैयाँ तोकिएको छ भने थप समूहका लागि ४० रूपैयाँ अतिरिक्त शुल्क लाग्नेछ।

नेपाल प्रहरीमा सेवाग्राही बन्न इच्छुक युवाका लागि यो अवसर हो। अधिक जानकारीका लागि प्रहरीको आधिकारिक वेबसाइट वा नजिकको प्रहरी कार्यालयमा सम्पर्क गर्न सकिनेछ।