हिमाल प्रेस 
इटहरी– कोशी प्रदेशमा दिगो फोहोरमैला व्यवस्थापनका लागि प्रदेश सरकार र मोरङका चार तथा इलामका दुई स्थानीय तहबीच रणनीतिक साझेदारी सम्झौता भएको छ।
यसअन्तर्गत मोरङका पालिकाको फोहोर व्यवस्थापन केन्द्र रंगेलीमा र इलामको पालिकाको केन्द्र सूर्योदय नगरपालिकामा स्थापना गरिनेछ।
प्रदेश भौतिक पूर्वाधार विकास मन्त्रालय, विराटनगर र मोरङको रंगेली नगरपालिका, सुनवर्षी नगरपालिका, कानेपोखरी गाउँपालिका तथा धनपालथान गाउँपालिकाबीच समझदारीपत्रमा हस्ताक्षर भएको हो।
यस्तै, इलामको सूर्योदय नगरपालिका र रोङ गाउँपालिकाले सम्झौतामा हस्ताक्षर गरेका छन्।
भौतिक पूर्वाधार विकास मन्त्रालय यस परियोजनाको कार्यान्वयनकर्ताको भूमिकामा रहनेछ। मन्त्रालयले विस्तृत परियोजना प्रतिवेदन (डीपीआर), वातावरणीय प्रभाव मूल्यांकन, बजेट, प्राविधिक सहयोग र पूर्वाधार विकासमा योगदान गर्नेछ।
सहभागी पालिकाले भने जग्गा व्यवस्थापन, स्थानीय कार्यान्वयन, जनचेतना अभिवृद्धि, फोहोरको पृथकीकरण, संकलन तथा प्राथमिक प्रशोधनमा जिम्मेवारी लिनेछन्।
यस परियोजनाको प्रभावकारी कार्यान्वयनका लागि सहभागी सबै पालिकाका प्रतिनिधिहरू सम्मिलित संयुक्त कार्य समिति गठन गरिनेछ। समितिले प्रगति समीक्षा, समस्या समाधान र सहजीकरण गर्नेछ।
सम्झौताअनुसार एकीकृत फोहोरमैला प्रशोधन केन्द्र र ल्यान्डफिल साइट निर्माण गरिनेछ। यसबाट फोहोरलाई व्यवस्थित संकलन, पुनःप्रयोग र वातावरणमैत्री ढंगले विसर्जन गर्ने प्रणाली विकास हुने विश्वास गरिएको छ।
सम्झौतामा प्रदेश सरकारको तर्फबाट निमित्त सचिव रमेश श्रेष्ठले हस्ताक्षर गरे। रंगेली नगरपालिकाका प्रमुख दिलिप अग्रवाल, सुनवर्षी नगरपालिकाका प्रमुख श्याम राजवंशी, धनपालथान गाउँपालिकाका अध्यक्ष जिवछ गच्छदार, कानेपोखरी गाउँपालिकाका अध्यक्ष राजमति इङ्नाम, सूर्योदय नगरपालिकाका प्रमुख रणबहादुर राई र रोङ गाउँपालिकाकी उपाध्यक्ष विष्णुमाया खवासले समेत सम्झौतामा हस्ताक्षर गरेका छन्।
भौतिक पूर्वाधार विकास मन्त्री भूपेन्द्र राईले यस साझेदारीले प्रदेशको वातावरण संरक्षण र विकासमा महत्वपूर्ण योगदान पुर्याउने विश्वास व्यक्त गरे। उनका अनुसार साझेदारीको उद्देश्य फोहोरलाई आधुनिक तरिकाले प्रशोधन र पुनःप्रयोग गर्दै प्रदेशलाई स्वच्छ, सुन्दर र स्वस्थ बनाउन रहेको छ।
