लेखनाथ उद्योग वाणिज्य संघमा ३८ जनाको उम्मेदवारी, अध्यक्षमा ओझा र पराजुली भिड्ने

पोखरा-  लेखनाथ उद्योग वाणिज्य संघको आगामी नयाँ कार्यसमितिका लागि ३८ जनाले उम्मेदवारी दिएका छन्। संघको यही २० र २१ भदौमा १९ औं साधारण सभा तथा १५ औं अधिवेशन हुँदैछ। मतदान २१ गते बिहान ७ बजेदेखि हुनेछ।

निर्वाचन आयुक्त वरिष्ठ अधिवक्ता खगेन्द्रराज आचार्यका अनुसार पदाधिकारी र सदस्यसहित कुल ३८ जनाले मनोनयन दर्ता गरेको जानकारी दिए। उम्मेदवारले १५ भदौ आइतबार दिउँसो ३ बजेसम्म मनोनयन फिर्ता लिने समय तोकिएको छ। सोही दिन अन्तिम नामावली प्रकाशित गरिने आचार्यले बताए।

संघको नयाँ नेतृत्वका लागि यसअघि नै चर्चामा रहेका हालका वरिष्ठ उपाध्यक्ष राजेन्द्र ओझा र महासचिव जानुका पराजुली अधिकारी प्यानलले आ-आफ्नो समूहबाट उम्मेदवारी दिएका छन्।

वर्तमान वरिष्ठ उपाध्यक्ष रहेका राजेन्द्र ओझा र वर्तमान महासचिव जानुका पराजुली अधिकारीले निर्वाचन हुने १९ पदका लागि आ-आफ्नो टिमबाट उमेदवारी दर्ता गराएका छन्। दुई कार्यकाल संघको कार्यसमिति सदस्य समेत रहेका बुद्धिप्रसाद बास्तोलाले स्वतन्त्र रूपमा उपमहासचिव पदमा उम्मेदवारी दिएका छन्।

संस्थागत सदस्यमा होटल तथा रेष्टुरेन्ट एसोसिएसन लेखनाथबाट वीरभद्र कँडेलको एकल उम्मेदवारी परेको छ।

ओझा प्यानलबाट वरिष्ठ उपाध्यक्षमा उपेन्द्रराज सुवेदी (राजु), प्रथम उपाध्यक्षमा मेनुका श्रेष्ठ, द्वितीय उपाध्यक्षमा धीरजकुमार श्रेष्ठ, महासचिवमा जीवन तिवारी, उपमहासचिवमा लक्ष्मीप्रसाद ढुंगाना (एलपी) र कोषाध्यक्षमा टीकाराम सापकोटाले उम्मेदवारी दिएका छन्।

पराजुली प्यानलबाट वरिष्ठ उपाध्यक्षमा गोपीचन्द्र बास्तोला, प्रथम उपाध्यक्षमा विक्रम कर्माचार्य, द्वितीय उपाध्यक्षमा ध्रुवबाबु भट्टराई (आई.डी.), महासचिवमा भरतराज ओझा, उपमहासचिवमा गंगाकुमारी मल्ल र कोषाध्यक्षमा हरि बस्ताकोटीले मनोनयन दिएका छन्।

१९ सदस्यीय कार्यसमितिमा आठ खुला सदस्यका लागि १६ जनाले मनोनयन दिएका छन्। ओझा प्यानलबाट घनश्याम ढुंगाना, किशोर अधिकारी, कृष्णप्रसाद सुवेदी, नवराज पौडेल, सन्तोष हमाल, शिवराज अधिकारी, सुरेन्द्र गुरुङ, भीमप्रसाद सुवेदी (सन्तोष) प्रतिस्पर्धामा छन्।

पराजुली प्यानलबाट खुला सदस्यमा प्रतीक्षा रानाभाट, प्रभाकुमारी पौडेल लामिछाने, वीरेन्द्रराज भूर्तेल, भविन्द्र पुन (भविन), सुजन न्यौपाने, दीपक अधिकारी, कृष्णप्रसाद तिमिल्सिना र सन्दीप बुढाथोकी छन्।

दुई महिला सदस्यका लागि सपना सुवेदी, लक्ष्मी ठाकुर (सुनार), गंगा सापकोटा परियार र शर्मिला श्रेष्ठले उम्मेदवारी दर्ता गराएका छन्। तीमध्ये सपना र लक्ष्मी ओझा प्यानलका हुन्।

एक एसोसिएट सदस्यमा प्रवेश बञ्जरा र दयाराज भण्डारी छन्। तीमध्ये प्रवेश चाहिँ ओझा प्यानलका हुन्।

संस्थागत सदस्यमा वीरभद्र कँडेल दुवै समूहका साझा उम्मेदवार रहेकाले एकल उम्मेदवारी परेको हो। उनी निर्विरोध भए पनि निर्वाचन समितिले आधिकारिक घोषणा गर्न बाँकी छ।

निर्वाचन सम्पन्न गर्न वरिष्ठ अधिवक्ता खगेन्द्रराज आचार्य निर्वाचन आयुक्त रहेको निर्वाचन समिति गठन गरिएको छ, जसको सदस्यमा हरि त्रिपाठी र राजेश भट्टराई छन्।

यसपालि स्पष्ट दुई प्यानल चुनावी मैदानमा उत्रिएपछि कडा प्रतिस्पर्धा हुने देखिएको छ। संघको २९ वर्षे इतिहासमा पहिलोपटक महिला उम्मेदवारले नेतृत्वका लागि दाबी गरेपछि झनै चुनाव रोचक हुने देखिन्छ।