उद्यमशीलता प्रवर्धनका लागि कोशी प्रदेशमा ‘उदय’ परियोजना, चार वर्षमा ३ हजार रोजगारी

इटहरी– कोशी प्रदेश सरकारले स्विस सरकारको सहयोगमा सुरु गरेको ‘उदय’ परियोजनाबाट चार वर्षभित्र ३ हजार रोजगारी सिर्जना हुने भएको छ। साना तथा मझौला व्यवसाय प्रवर्द्धन र उद्यमशीलताको विकासलाई लक्षित यो परियोजनाबाट ८ अर्ब रुपैयाँ बराबरको लगानी परिचालन हुने अपेक्षा गरिएको हो।

६० करोडको ग्यारेन्टी फन्डमार्फत कर्जा सुरक्षा र २८ करोडको च्यालेञ्ज फन्डमार्फत प्रतिस्पर्धात्मक क्षमता अभिवृद्धि गर्ने योजना रहेको छ। परियोजना १४ जिल्लामा विस्तार गरी नयाँ उद्योग स्थापना, बजार प्रवर्द्धन र उद्यमशीलतालाई संस्थागत बनाइने कोशी प्रदेश सरकारको भनाइ छ।

यसबाहेक इनफर्मेशन पोर्टलमार्फत बजारसम्बन्धी सूचना उपलब्ध गराउने व्यवस्था पनि परियोजनाले गर्नेछ। परियोजनाअन्तर्गत बिना धितो ३० लाखदेखि ३ करोडसम्मको कर्जा उपलब्ध गराइने र त्यसका लागि बैंक छनोटको प्रक्रिया अघि बढाइएको छ।

उदय परियोजनाले प्रदेशमा उद्यमशीलताको विकाससँगै ठूलो संख्यामा रोजगारी सिर्जना गर्ने र आर्थिक आधारलाई मजबुत पार्ने लक्ष्य लिएको छ।

परियोजनाको प्रभावकारी कार्यान्वयनका लागि कार्यविधि तयार भइसकेको र अब कार्यान्वयन चरणमा प्रवेश गरेको छ। ‌‌यो परियोजनालाई प्रदेश सरकारले प्रदेशका १४ वटा जिल्लामा पु¥याउने लक्ष्य राखेको छ।

पहाडी क्षेत्रको बसाइँसराईलाई मध्यनजर गरेर त्यहाँ सञ्चालन रहेका साना तथा मझौला उद्योगलाई प्रवर्धन गर्ने र नयाँ उद्योगहरू स्थापनाका लागि प्रोत्साहन गर्ने नीति कोशी प्रदेश सरकारले लिएको छ।

यो परियोजना अन्तर्गत कोशी प्रदेश सरकारको क्रेडिट ग्यारेन्टीमा झण्डै ८ अरब रुपैयाँ लगानी परिचालन हुनेछ।

पहिलो चरणमा चार वर्षसम्म सञ्चालन हुने यो परियोजनाबाट कोशी प्रदेशमा ३ हजार रोजगारी सिर्जना हुनेछ। परियोजनाका व्यवसाय विकास प्रमुख विष्णु काफ्लेले यो परियोजनाको प्रोजेक्ट १० वर्षसम्म सञ्चालन गर्ने गरी तयार गरिएको बताए।

उनले पहिलो चरणमा यो परियोजना चार वर्षसम्मको हुने जानकारी दिए। उदय परियोजनाका टिमको नेतृत्व अरुण राणाले यो परियोजनालाई सफल रूपमा अगाडि बढाउने गरी तयारी गरिएको बताउँदै परियोजना लाई व्यापक रूपमा नयाँ उद्यम गर्न चाहने र उद्यम गरिरहेका हरूको बीचमा पुर्‍याउने योजना समेत रहेको जानकारी दिए।

मुख्यमन्त्री हिक्मत कार्कीका आर्थिक सल्लाहकार डा. मोहन सुवेदीले यो परियोजनाबाट कोशी प्रदेशलाई थप उचाइमा लैजानको लागि सहयोग पुग्ने जानकारी दिए। मुख्यमन्त्री कार्कीको पहलकदमीमा भएको एउटा महत्त्वकांक्षी र महत्वपूर्ण परियोजना भएको उनले बताए।

आर्थिक मामिला तथा योजनामन्त्री रामबहादुर रानाले परियोजना सञ्चालन भएसँगै प्रदेशमा महत्वपूर्ण उपलब्धि हासिल हुने बताए।

मुख्यमन्त्री कार्कीले भने आर्थिक उदय परियोजनालाई कोशी प्रदेशमा नमुनाका रूपमा सफल बनाएर देशव्यापी रूपमा उदाहरण दिने प्रतिबद्धता व्यक्त गरे।

उनले भने, ‘यो परियोजना कोशी प्रदेशको आर्थिक समृद्धि र विकासका लागि कोसेढुङ्गा हुनेछ।’

मुख्यमन्त्री कार्कीले कोशी प्रदेश सरकारले पर्यटन कृषिमा ध्यान दिएको उल्लेख गर्दै पदमार्गमा आधारित पर्यटन विकासका लागि चारवटा पदमार्ग निर्माण गरिरहेको बताए।