हिमाल प्रेस 
गृहमन्त्री रमेश लेखक।
काठमाडौँ– गृहमन्त्री रमेश लेखकले लोकतन्त्र प्राप्तिपछि सरकारले देशमा धेरै काम गरे पनि केही गर्न सकेन भन्ने नकारात्मक भाष्य निर्माण गर्ने प्रयास भइरहेको बताएका छन्।
बुधबार भक्तपुरको दुधपाटीस्थित जुद्ध बारुणयन्त्र कार्यालयको नयाँ कार्यालय भवन उदघाटन गर्दै उनले लोकतन्त्र प्राप्तिपछि सरकारले केही गर्न सकेन, देशमा केही भएन भन्ने गरी भाष्य निर्माण गर्नु गलत भएको बताएका हुन्।
गृहमन्त्री लेखकले भने, ‘तत्कालिन राजाले ‘कु’ गरेर प्रजातन्त्र समाप्त पारेको दिन जनताले बिर्सनु भएको छैन भन्ने मलाई विश्वास छ। प्रजातन्त्र समाप्त पारेर राज्य सत्ता एकलौटी हातमा लिएपछि सबभन्दा पहिला नेपाली सेना र प्रहरीले सञ्चार माध्यममा छापा मारेर समाचारमा रोक लगाएको, प्रकाशित पत्रिकाहरु बन्द गराउनेदेखि जफत गरेर लगेको, पत्रकारलाई धम्क्याएको, जनताको आवाज बन्द गराएको सिंगो प्रेस जगत र जनताले बिर्सेका छैनन्, त्यसैले यो व्यव्स्था चाहिँदैन भनेर नेपाली जनताले भन्नु सक्नुहुन्न।’
गणतन्त्रको विकल्प अन्य कुनै व्यवस्था हुन नसक्ने भन्दै उनले भने, ‘केही हुँदै नभएको, केही गर्दै नगरेको होइन, धरै काम भएका छन् तर जनताले सोचे जस्तो छिटो काम नभएको पक्कै हो। मुलुकमा समस्या छैनन् भनेर म भन्दिनँ, समस्या छन्, त्यसलाई हल गर्दै अगाडि जाने व्यव्स्था लोकतन्त्र मात्रै हो।’
विभिन्न चुनौती र समस्याका बाबजुद धेरै काम भएको बतउँदै उनले लोकतन्त्रले जनताको आवाजलाई सुनेर समृद्धिको यात्रामा अगाडि बढ्ने बताए। एकतन्त्रीय व्यव्स्थाले जनताको र सञ्चारको आवाज कुल्चिने काममात्र गर्ने उनले बताए।
गृहमन्त्री लेखकले भने, ‘जनताको स्वतन्त्रता, भावना, आवाज बन्द गर्ने निरंकुशताको शासन हामीले व्यहोरी सकेका छौँ। जनताले बलिदान दिएर ल्याएको लोकतन्त्रलाई बिर्सिएर फेरी त्यही व्यबस्था चाहियो भनेर जनताले भन्छन् भनेर विश्वास गर्न सकिन्न, यो त केही तत्वहरुले भ्रम फैलाइरुहेका मात्रै हुन्, यो भ्रम पनि केही दिनमै सकिन्छ।’
यस्ता भ्रमको खेतीले जनता अब नअल्झिने बताउदै उनले लोकतन्त्र भएमात्रै स्वच्छ पत्रकारिता, स्वतन्त्रता, सञ्चार जगत, जनताको आवाज रहन्छ भन्ने सञ्चार जगतले पनि बुझेको बताए।
