ट्रकको ठक्करबाट मोटरसाइकल चालकको मृत्यु

भक्तपुर– अरनिको राजमार्ग खण्डअन्तर्गत मध्यपुरथिमि नगरपालिका–३ गठ्ठाघरचोकमा ट्रकको ठक्करबाट मोटरसाइकल चालकको मृत्यु भएको छ।

भक्तपुरबाट काठमाडौँतर्फ जाँदै गरेको बागमती प्रदेश ०३–००१ ख १८८४ नम्बरको ट्रकले सोही दिशातर्फ जाँदै गरेको बा ३१ प ४४४ नम्बरको मोटरसाइकललाई ठक्कर दिँदा मोटरसाइकल चालक भक्तपुर नगरपालिका–६ बस्ने ३६ वर्षीय श्यामकृष्ण कायस्थको मृत्यु भएको प्रहरी वृत्त थिमिले जानकारी दिएको छ।

प्रहरीले ट्रक चालक सिन्धुपाल्चोक बाह्रबिसे नगरपालिका–६ घर भई हाल मध्यपुरथिमि–३ सागबारी बस्ने ४७ वर्षीय चन्द्रलाल शाक्यलाई पक्राउ गरी अनुसन्धान अगाडि बढाएको प्रहरीले जनाएको छ।