भृकुटीमण्डपमा फागुन ८ देखि नेपाल बिल्डकन अन्तर्राष्ट्रिय प्रदर्शनी हुने

काठमाडौँ- भृकुटीमण्डपमा फागुन ८ देखि ११ गतेसम्म १०औँ नेपाल बिल्डकन अन्तर्राष्ट्रिय प्रदर्शनी हुने भएको छ। प्रदर्शनीमा विभिन्न देशका ३ सयभन्दा बढी कम्पनीहरूका १५० बढी स्टल रहनेछन्।

प्रदर्शनीमा निर्माणसम्बन्धी उद्योग, कम्पनी, डिलर तथा सब डिलरहरू र बिक्रेताहरूले निर्माण व्यवसायसँग सम्बन्धित उत्पादनहरूको बारेमा जानकारी गराउने प्रदर्शनी र स्टलहरू रहने मिडिया स्पेश सोलुसन्स प्रालिले जनाएको छ।

अन्तर्राष्ट्रिय प्रदर्शनीमा कन्स्ट्रक्शन मेटेरियल्स, कन्स्ट्रक्शन मेसिनरी, प्रिफ्याब स्ट्रक्चर, युपिभिसी विन्डोज मेसिनरी, युपिभिसि प्रोफाइल, डोर्स एण्ड विन्डोज, आर्किटेक्चर हार्डवेयर,बाथरुम फिटिङ्स, पाइप, टायल्स एण्ड स्यानिटरी वायर, रफिङ, प्रि इन्जिनियरिङ बिल्डिङ, पावर टुल्स, विन्डोजलगायतका सामाग्रीहरू रहनेछन्।

मिडिया स्पेस सोलुसन्स प्रालि र फ्युचरएक्स ट्रेड फेयर एण्ड इभेन्ट्स प्रालिले संयुक्त रुपमा आयोजना गरेको प्रदर्शनीले निर्माण व्यवसायसँग सम्बन्धित उत्पादनहरू र नविनतम् प्रविधि प्रमुख आकर्षण हुने आयोजकको विश्वास छ।

निःशुल्क प्रवेशको व्यवस्था गरिएको प्रदर्शनी बिहान १० देखि बेलुका ६ बजेसम्म हुने र ४ दिन सञ्चालन हुनेछ।  प्रदर्शनीले नेपालमा उत्पादन भइरहेका सामग्री र प्रविधिहरूलाई पनि अन्तर्राष्ट्रिय बजारसम्म लैजान सहयोग पुग्ने आयोजकको विश्वास छ।

प्रदर्शनीमा निर्माण क्षेत्रमा काम गरीरहेका नेपालका आर्कीटेक्ट, इन्जिनियरस, कन्ट्रयाक्टर, बिल्डर, इन्टीरीयर डिजाइनरहरूको उल्लेख्य सहभागिता रहने बताइएको छ। साथै निजी घर बनाउन चाहने, व्यापारिक कम्प्लेक्स, व्यावसायिक भवन बनाउने व्यक्ति तथा संस्था सार्थ आम नागरिकको बढीभन्दा बढी सहभागिता रहने आयोजकले जनाएको छ।