हिमाल प्रेस 
काठमाडौँ- महानायक राजेश हमालको मुख्य भूमिकामा फिल्म ‘नरसिंहा अवतार’ बन्ने भएकाे छ। निर्देशक दिवाकर भट्टराईले सोमबार थिम पोस्टर सार्वजनिक गर्दै हमाल अभिनीत फिल्मको नाम ‘नरसिंहा अवतार’ राखिएको जानकारी दिएका हुन्।
यही फिल्मबाट महानायक हमालले ८ वर्षपछि कमब्याक गर्दैछन्। महानायक हमाल केही दिनअघि फिल्ममा अनुबन्धित भएका थिए।
थिम पोस्टरमा रातो र निलो रङ प्रयोग छ। दायामा रातो (आगो) र दायातर्फ निलो समुद्रको रङ छ। साथै पोस्टरमा नरसिंहाको उग्र अवतार पनि समावेश गरिएको छ। यसमार्फत फिल्मको कथा युद्ध र शान्तिको हुने संकेत गरेको छ। फिल्मका अन्य कलाकारकोबारे खुलाइएकाे छैन। क्रिएटिभ सिने आर्टको प्रस्तुतिमा बन्न लागेको हो।
नरसिंहाको अर्थ भगवान बिष्णुको उग्र अवतार हो। नरसिंह रूप भगवान बिष्णुको दश अवतार मध्ये चौथो अवतार हो। दैत्यराज हिरण्यकश्यपुको बध गर्नको निमित्त र भक्त प्रह्लादको उद्दारका लागि विष्णु भगवानले नरसिंहा अवतार धारण गर्नुपरेको थियो।
