हिमाल प्रेस 
फाइल तस्बिर
काठमाडौँ- नेपाल क्रिकेट संघ (क्यान)ले मलेसियामा हुने एसीसी महिला प्रिमियर कपमा सहभागी हुने टिमको छनोट गरेको छ।
क्यानले इन्दु बर्माको कप्तानीमा १४ सदस्यीय टिमको मंगलबार घोषणा गरेको हो। एसीसी महिला प्रिमियर कप फेब्रुअरी १० देखि १८ सम्म मलेसियामा हुँदैछ।
नेपाली महिला राष्ट्रिय क्रिकेट टिममा इन्दु बर्मा (कप्तान), बिन्दु रावल, रुबिना क्षेत्री, सिता राना मगर, काजल श्रेष्ठ, पुजा महतो, संगीता राई, अप्सरा बेगम, कविता जोशी, कबिता कुँवर, सम्झना खड्का, रोमा थापा, डली थापा र अश्मिना कर्माचार्य रहेका छन्।
त्यसैगरी महिला टिमको हेड कोचमा मनोज कटवाल, सहायक कोचमा जानकी भट्ट, फिजियोमा कमला श्रेष्ठ र म्यानेजरमा अम्बिका बुढाथोकी रहेका छन् ।
एसीसी महिला प्रिमियर कपमा नेपाल, आयोजक मलेसियासहित थाइल्याण्ड, यूएई, इन्डोनेसिया, हङकङ, चीन, म्यान्मार, भुटान, बहराइन, ओमान, कुवेत, सिंगापुर, जापान, कतार र माल्दिभ्स रहेका छन्।
प्रतियोगिताको विजेता र उपविजेता एसीसी महिला एशिया कप २०२४ मा छनोट हुने छन् ।
प्रतियोगितामा नेपाल समूह डी मा रहेको छ । समूह डी मा नेपालसहित हङकङ, माल्दिभ्स र भुटान रहेका छन्। नेपालले पहिलो खेल फेब्रुअरी १० मा हङकङसँग खेल्ने छ भने दोस्रो खेल भुटानसँग फेब्रुअरी ११ मा र तेस्रो खेल माल्दिभ्ससँग फेब्रुअरी १३ मा खेल्ने छ।
