हिमाल प्रेस 
काठमाडौँ– न्याय परिषद्ले उच्च अदालत र जिल्ला अदालतका न्यायाधीशको सरुवा गरेको छ। मंगलबार बसेको परिषद्को बैठकले उच्च अदालतका ३ जना र जिल्ला अदालतका ६ जना न्यायाधीशको सरुवा गरेको हो। यस्तै, ३ जना जिल्ला न्यायाधीशको काज सरुवा गर्ने निर्णय भएको छ।
परिषद्ले उच्च अदालत सुर्खेतका न्यायाधीश रामेश्वर रेग्मीलाई उच्च अदालत पाटन, सुर्खेत उच्च अदालतकै काजीबहादुर राईलाई उच्च अदालत विराटनगर र उच्च अदालत तुलसीपुरको बुटवल इजलासका विष्णुप्रसाद अर्याललाई उच्च अदालत तुलसीपुर सरुवा गर्ने निर्णय गरेको हो।
परिषद्को बैठकले कास्की जिल्ला अदालतका न्यायाधीश ऋषिराम आचार्यलाई ललितपुर, सुनसरी जिल्ला अदालतका न्यायाधीश हरिप्रसाद कोइरालालाई कास्की, कास्की जिल्ला अदालतका न्यायाधीश अवनी मैनाली भट्टराईलाई मकवानपुर जिल्ला अदालत सरुवा गर्ने निर्णय गरेको छ। यस्तै, तेह्रथुम जिल्ला अदालतका न्यायाधीश प्रमेश पोखरेललाई पर्सा, रौतहट जिल्ला अदालतका न्यायाधीश तेजबहादुर खड्कालाई झापा र झापा जिल्ला अदालतका न्यायाधीश भीम निरौलालाई नवलपुर सरुवा गर्ने निर्णय भएको छ।
परिषद्को बैठकले डडेलधुरा जिल्ला अदालतका न्यायाधीश दयाराम ढकाललाई चितवन, नवलपुर जिल्ला अदालतका न्यायाधीश बाबुराम सुवेदीलाई मोरङ जिल्ला अदालत र दाङ जिल्ला अदालतका न्यायाधीश कुलप्रसाद पाण्डेलाई नवलपुर जिल्ला अदालतमा काज सरुवा गर्ने निर्णय गरेको छ।
जिल्ला न्यायाधीश ढकालको काज सरुवापछि डडेलधुरा जिल्ला अदालत न्यायाधीशविहीन भएको छ। अर्को न्यायाधीशको सरुवा नहुन्जेलसम्म बैतडी जिल्ला अदालतका न्यायाधीश हर्कबहादुर क्षेत्रीलाई डडेलधुरा जिल्ला अदालतको जिल्ला न्यायाधीशको हैसियतले पनि काम गर्नेछन्।
