हिमाल प्रेस 
काठमाडौँ- अर्थमन्त्री डा.प्रकाशशरण महतले भारतलगायत विभिन्न देशका लगानीकर्तालाई नेपालमा वैशाख १६ र १७ गते हुने लगानी सम्मेलनमा सहभागी हुन निम्तो दिएका छन्।
भारतको गुजरातमा आयोजित ‘भाइब्रेन्ट गुजरात ग्लोबल समिट, २०२४’ मा सहभागी विभिन्न देशका राष्ट्रप्रमुख, मन्त्री र लगानीकर्तालाई सम्बोधन गर्दै मन्त्री महतले निम्तो दिएका हुन्।
सम्मेलनलाई सम्बोधन गर्दै अर्थमन्त्री महतले भने,‘नेपालमा वैशाख १६ र १७ गते लगानी सम्मेलन हुँदैछ। यो कार्यक्रमबाट म भारतसँगै अन्य देशका लगानीकर्तालाई निम्तो गर्छु। तपाईंहरूको इनोभेटिभ बिजनेस आइडिया र लगानीको निर्णयले नेपालको विकासका लागि नयाँ माइलस्टोन खोल्नेछ भन्ने आशा गर्दछु।’
महतले नेपालमा ऊर्जा, पर्यटन, कृषि व्यवसाय र आईटीमा लगानीको ठूलो अवसर रहेको बताए। उनले स्वास्थ्य, शिक्षा, उत्पादन, निर्माण र यातायात, खानी, बैंकिङ र वित्तीय सेवाजस्ता लगानीका अन्य सम्भावित क्षेत्रहरू पनि रहेको जानकारी गराए।
मन्त्री महतले भाइब्रेन्ट गुजरात विकास मोडल वित्तीय स्रोत र प्राविधिक ज्ञानको व्यवस्थापन गर्न नेपाललगायत धेरै देशका लागि प्रेरणाको स्रोत भएकोसमेत बताएका छन्।
अर्थमन्त्री महतले भने, ‘सन् २०१४ मा नेपालको संसदमा मोदीजीले ‘हिट’ मा जोड दिनुभएको थियो, त्यो हो- हाइवे, इन्फर्मेसन र ट्रान्समिसन लाइन। हामी यी सबै क्षेत्रमा कनेक्टिभिटी सुधार गर्न, बजार सम्बन्धलाई बलियो बनाउन र लेनदेन लागत घटाउन काम गरिरहेका छौँ।’
अर्थमन्त्रीले महतले नेपाल र भारतबीच हालै भएको विद्युत् खरिद सम्झौताले नेपालको जलविद्युतमा लगानीको ठूलो अवसर खोल्ने पनि बताए। उनले भने, ‘यसले नेपालमा मात्र नभइ भारतमा पनि हरित ऊर्जा संक्रमण लक्ष्य हासिल गर्न मद्दत गर्नेछ।’
