हिमाल प्रेस 
काठमाडौँ– प्रहरीले काठमाडौंको थानकोटबाट बरामद गरेको चाँदीको यकिन परिमाण ६९ किलो भएको पाइएको छ । सोमबार उपत्यका अपराध अनुसन्धान कार्यालयले थानकोटबाट भन्सार छलीको चाँदीसहित भारतीय नागरिक अमन सर्राफलाई पक्राउ गरेको थियो ।
आवश्यक प्रक्रिया पूरा गरेस जोख्दा चाँदीको कुल परिमाण ६९ किलो पुगेको उपत्यका अपराध अनुसन्धान कार्यालयका एसएसपी सन्तोष खड्काले बताए । सो चाँदीको बजार मूल्य २ करोड ३६ लाख ३२ हजार रुपैयाँ पर्छ । यसअघि प्रहरीले चाँदी करिब ६० किलो भएको अनुमान गरेको छ ।
चाँदीको अवैध ओसारपसारमा संलग्न अमन भारतीय नागरिक हुन् । बिहारको रक्सौल घर भएका अमनले थानकोटमा अमन सुनचाँदी पसल सञ्चालन गर्दै आएका थिए ।
अमनले मोटरसाइकलमा फल्स बटम बनाएर चाँदी ल्याउने गरेको प्रहरीको प्रारम्भिक अनुसन्धानले देखाएको छ । अमनका बुवा–आमालाई आइतबार मकवानपुर प्रहरीले हेटौँडाबाट १४ केजी चाँदीसहित पक्राउ गरेको थियो । बुवा रमेश कुमार साह र आमा चन्दा सोनी पक्राउ परेपछि प्रहरीले अमनलाई पक्राउ गरेको हो । उनको पसल र डेरा खानतलासी गर्दा भन्सार छलेर ल्याएको चाँदी भेटिएको थियो ।
बरामद चाँदीसहित आरोपीलाई कानुनी कारबाहीका लागि त्रिभुवन अन्तर्राष्ट्रिय विमानस्थल भन्सार कार्यालयमा पठाइने एसएसपी खड्काले जानकारी दिए ।
