हिमाल प्रेस 
काठमाडौँ– फ्रान्सको लिमोज सहरस्थित ऐतिहासिक टाउन हलमा आगजनी गरेको आरोपमा ४० वर्षीय एक पुरुष पक्राउ परेका छन् ।
अधिकारीहरूका अनुसार पक्राउ परेका व्यक्ति कट्टर वामपन्थी समूहहरूसँग आबद्ध रहेको आशंका गरिएको छ । घटनाको गम्भीरतालाई ध्यानमा राख्दै अनुसन्धानमा आतंकवादविरोधी प्रहरी टोलीलाई समेत संलग्न गराइएको छ ।
मध्य फ्रान्सको लिमोज सहरमा रहेको ऐतिहासिक टाउन हलमा गत अक्टोबर १७ मा भीषण आगलागी भएको थियो । आगलागीबाट भवनको छाना र घण्टाघर पूर्ण रूपमा ध्वस्त भएका थिए ।
लिमोज अभियोजकको कार्यालयका अनुसार ४० वर्षीय व्यक्तिलाई नजिकैको सहर वाल दिजियरबाट विशेष प्रहरी इकाई ‘रेड’का अधिकारीहरूले मंगलबार पक्राउ गरेका हुन् ।
अधिकारीहरूका अनुसार ती व्यक्ति यसअघि नै सुरक्षा निकायको निगरानीमा रहेका थिए । उनी सम्भावित खतराका रूपमा सूचीकृत हुनुका साथै कट्टर वामपन्थी आन्दोलनसँग आबद्ध रहेको आशंका गरिएको छ ।
अक्टोबर १७ मा लिमोजमा भएको विरोध प्रदर्शनमा करिब पाँच हजार मानिस सहभागी भएका थिए । अधिकारीहरूका अनुसार तीमध्ये करिब ७०० जना अतिवादी तथा अत्यधिक हिंसात्मक गतिविधिमा संलग्न रहेको आशंका गरिएको थियो ।
