हिमाल प्रेस 
काठमाडौँ- रसुवास्थित त्रिशूली–३ ‘ए’ जलविद्युत् आयोजनाको सुरुङबाट जीवित उद्धार गरिएका कबीर महर्जनको छाउनीस्थित वीरेन्द्र सैनिक अस्पतालको सघन उपचार कक्ष (आईसीयू) मा उपचार सुरु गरिएको छ।
बाढी आएको १० दिनपछि जीवित उद्धार गरिएका महर्जनलाई उद्धारपछि प्रारम्भिक उपचार गरी थप उपचारका लागि हेलिकोप्टरमार्फत छाउनीस्थित सैनिक अस्पताल ल्याइएको थियो।
जीवित उद्धार भएपछि कबीरका आफन्तजनहरु सैनिक अस्पताल पुगेका छन्। सो क्रममा कबीरकी श्रीमती हीराशोभा महर्जनले सकुशल उद्धार र उपचारमा खटिने नेपाली सेना, चिकित्सक टोली, आफन्तजन तथा नेपाल सरकारलाई विशेष धन्यवाद दिए।
उनले हेलिकप्टरबाट ल्याउँदा सुरुमा आफन्तलाई चिन्न नसकेको र केवल ‘म कहाँ छु, मलाई के भएको हो?’ मात्र भनेको जानकारी दिइन्।
परिवारले दिनरात नभनी विगत १० दिनदेखि चिन्ता र पर्खाइमा बिताएको र उद्धार भएको खबर र तस्बिर देखेपछि परिवारमा खुसीको आँसु आएको र सबैजना निकै भावुक बनेको महर्जनले बताइन्।
