हिमाल प्रेस 
काठमाडौँ- फिपा विश्वकपको समूह चरणमा स्टार खेलाडीहरूको गोलको वर्षा र लोकप्रिय टोलीहरूको लगातार जितले सट्टेबाजी कम्पनीहरूलाई ठूलो आर्थिक नोक्सानी व्यहोर्न बाध्य बनाएको छ। नयाँ ग्राहक आकर्षित गरेर ठूलो आम्दानी गर्ने अपेक्षा गरेका कम्पनीहरूका लागि प्रतियोगिताको सुरुआती चरण उल्टै महँगो साबित भएको हो।
अमेरिकाको अग्रणी अनलाइन स्पोर्ट्स बेटिङ कम्पनी ड्राफ्टकिङ्सले समूह चरणमै करिब पाँच करोड अमेरिकी डलरसम्म घाटा व्यहोरेको हुन सक्ने अनुमान बैंक अफ अमेरिकाले गरेको छ।
विश्वकपलाई लक्षित गर्दै सट्टेबाजी कम्पनीहरूले प्रत्यक्ष खेलका क्रममा गरिने नयाँ प्रकारका बेट र विभिन्न प्रवर्द्धनात्मक योजनामा ठूलो लगानी गरेका थिए। फुटबलमा हुने सट्टेबाजीबाट ठूलो आम्दानी गर्ने अपेक्षासँगै उनीहरूले पोलिमार्केट र काल्सीजस्ता भविष्यवाणी बजारसँगको प्रतिस्पर्धा पनि सामना गरिरहेका छन्।
वित्तीय विश्लेषक जोर्डन बेन्डरका अनुसार विश्वकपका अवसरमा स्पोर्ट्स बेटिङ कम्पनी, ब्रोकरेज संस्था र भविष्यवाणी बजारहरूले नयाँ ग्राहक तान्न सयौँ मिलियन डलर खर्च गरिरहेका छन्।
सबैभन्दा बढी घाटा सट्टेबाजी (अमेरिकामा पार्ले र बेलायतमा अकुमुलेटर) बाट भएको देखिएको छ। गत मंगलबार लिओनेल मेस्सी, एर्लिङ हालान्ड र किलियन एम्बाप्पेले समान रूपमा दुईदुई गोल गरेपछि यस्तो बेट लगाउने धेरैले ठूलो रकम जितेका थिए।
पार्लेमा एउटै टिकटमा धेरै भविष्यवाणी सही भएमा ठूलो रकम भुक्तानी गरिन्छ। सामान्यतया सबै अनुमान मिल्ने सम्भावना कम हुने भएकाले यी कम्पनीहरूका लागि अत्यन्त लाभदायी मानिन्छ। तर यसपटक तीनै स्टार खेलाडीले कम्तीमा दुई-दुई गोल गर्ने अनुमान सही साबित भएपछि बेटिङ कम्पनीहरूले ठूलो रकम तिर्नुपरेको थियो। यस्तो सम्भावनाको मूल्यांकन करिब एक प्रतिशत मात्र गरिएको थियो।
ड्राफ्टकिङ्सले अनुमानित घाटाबारे टिप्पणी गर्न अस्वीकार गरेको छ। कम्पनीका प्रमुख कार्यकारी अधिकृत जेसन रोबिन्सले यसअघि विश्वकपलाई नयाँ ग्राहक भित्र्याउने सबैभन्दा ठूलो अवसरका रूपमा व्याख्या गरेका थिए।
सट्टेबाजी कम्पनीहरूले खेलको सम्भावना गणना गर्न विशेषज्ञ विश्लेषकहरूको टोली प्रयोग गर्छन् र उनीहरूले तोकेको ‘अड्स’ मा नाफाको भाग राखेर आम्दानी गर्छन्। सामान्यतया चर्चित टोली वा स्टार खेलाडीले अपेक्षाअनुसार प्रदर्शन गर्न नसक्दा कम्पनीहरू बढी नाफामा हुन्छन्, किनभने धेरैजसो सट्टेबाजले आफ्नै देशको टोली र चर्चित गोलकर्तामाथि रकम लगानी गर्छन्।
यस कारण ठूलो सट्टेबाजी बजार भएका अमेरिका र बेलायतजस्ता देशका टोलीहरूको प्रदर्शन कम्पनीका लागि विशेष महत्त्वपूर्ण हुन्छ। बैंक अफ अमेरिकाकी विश्लेषक जुली हुभरका अनुसार अमेरिकी टोलीको उत्कृष्ट प्रदर्शन अमेरिकी स्पोर्ट्सबुक कम्पनीहरूको सबैभन्दा ठूलो आर्थिक जोखिम बनेको छ।
बेलायतले क्रोएसियालाई ४-२ ले पराजित गरेको खेलले पनि बेटिङ कम्पनीहरूलाई महँगो परेको थियो। फ्लटर समूहका बेलायती ग्राहकहरूले उक्त खेलबाट ४१ लाख पाउन्ड जितेका थिए। फ्लटरअन्तर्गत प्याडी पावर, स्काई बेट र फ्यानड्युलजस्ता ब्रान्ड सञ्चालनमा छन्। यद्यपि कम्पनीले बेलायत र घानाबीच भएको ०-० बराबरीले त्यसअघिको घाटा धेरै हदसम्म पूर्ति गरेको जनाएको छ।
म्याक्वारीका विश्लेषक चाड बेननका अनुसार विश्वकपबाट तत्काल ठूलो आम्दानी हुने सम्भावना कम देखिए पनि यसले कम्पनीहरूको ब्रान्ड चिनाउने र पछि अनलाइन क्यासिनोजस्ता बढी नाफा हुने सेवामा ग्राहक आकर्षित गर्ने अवसर भने सिर्जना गर्नेछ।
फ्लटरका प्रमुख कार्यकारी अधिकृत पिटर ज्याक्सनले सन् २०२२ को विश्वकप फाइनलमा अर्जेन्टिनाले फ्रान्सलाई हराउँदा कम्पनीले ठूलो रकम गुमाएको स्मरण गर्दै दीर्घकालीन रूपमा भने प्रतियोगिताले कम्पनीलाई फाइदा पुर्याएको बताएका छन्। उनले भने, ‘त्यो बेला हामीले धेरै पैसा गुमायौँ, तर त्यसबाट ग्राहकलाई उत्कृष्ट मनोरञ्जन दिन सक्यौँ, जुन हाम्रा लागि अझ महत्त्वपूर्ण थियो।’ फाइनान्सियल टाइम्सबाट
