हिमाल प्रेस 
काठमाडौँ- पूर्व–पश्चिम राजमार्ग अन्तर्गत दाउन्ने खण्डको सडक निर्माण कार्य अन्तिम चरणमा पुगेको छ। यस खण्डमा गरिएको ढलान (कङ्क्रिटिङ)को आयु कम्तीमा ३० वर्ष हुने आयोजनाले दाबी गरेको छ। सडक विभाग आयोजना निर्देशनालय (एडीबी)का आयोजना निर्देशक चुडाराज ढकालकाअनुसार दाउन्नेको भौगोलिक अवस्था र सवारी चापलाई मध्यनजर गर्दै कालोपत्रेको सट्टा गुणस्तरीय ढलान गरिएको हो।
३० वर्षको आयु सुनिश्चित हुनेगरी ढलान गरेको र यदि भार नियन्त्रण हुनसके र डिजाइन अनुसारका अन्य मापदण्डहरू पालना भए ४० वर्षसम्मै ढलान टिक्ने उनको दाबी छ। जसले नागरिकले दाउन्नेमा भोग्दै आएको सास्ती अन्त्य हुने उनले विश्वास व्यक्त गरे।
सडकको भारवहन क्षमता एकल चक्कामा १० टन रहेको जानकारी दिँदै उनले आगामी २० देखि ३० वर्षको सवारी चापको पूर्वानुमान (फोरकास्ट)लाई आधार मानेर दैनिक १२ देखि २० हजार सवारी साधन आवतजावत गर्दा पनि सडकमा कुनै क्षति नपुग्ने गरी यसको निर्माण गरिएको जानकारी दिए। हाल दाउन्ने मन्दिर मुनिको पहिरो प्रभावित क्षेत्रमा करिव ५० मिटर एकतर्फी ढलान गर्नमात्र बाँकी रहेको छ। सडकको एकातर्फको भाग पूर्णरूपमा सम्पन्न भई सवारी आवागमन सुचारु भइसकेको ढकालले बताए।
कालोपत्रे गर्दा सडक छिटो बिग्रने र सर्वसाधारणले निरन्तर सास्ती खेप्नुपर्ने अवस्थालाई दृष्टिगत गर्दै आयोजनाले ढलाईको विकल्प रोजेको हो। यससँगै दाउन्ने खण्डमा वर्षेनी हुने सडक अवरोध र मर्मतको समस्या दीर्घकालीन रूपमा समाधान हुने विश्वास सरकारले लिएको छ।
