हिमाल प्रेस 
काठमाडौँ- सन् २०२६ को फिफा विश्वकप मेक्सिको सिटीमा रंगीन उद्घाटन समारोह, सांस्कृतिक प्रस्तुतिहरू र विश्वप्रसिद्ध गायिका शकिराको आकर्षक प्रस्तुति सहित औपचारिक रूपमा सुरु भएको छ।
मेक्सिको सिटीस्थित ऐतिहासिक अज्टेका रंगशालामा हजारौँ फुटबल समर्थकहरू उत्साहका साथ उपस्थित भएका थिए। ४० वर्षपछि आफ्नै भूमिमा विश्वकप आयोजना भएकाले मेक्सिकन समर्थकहरूमा विशेष उत्साह देखिएको थियो।
तर रंगशालाबाहिर केही उग्र प्रदर्शनकारीहरूले कार्यक्रम अवरुद्ध गर्ने प्रयास गर्दा सुरक्षाकर्मीहरूसँग छिटपुट झडप पनि भएको थियो। यद्यपि अधिकांश समय फुटबल नै मुख्य आकर्षण बन्यो र मेक्सिकोले आफ्नो पहिलो खेलमा दक्षिण अफ्रिकालाई २-० ले पराजित गर्दै प्रतियोगिताको सुखद सुरुवात गर्यो।
उद्घाटन खेल हेर्न परिवारसहित आएका हाभियर पेरेजले बीबीसीसँग कुरा गर्दै विश्वकपको अनुभव अविस्मरणीय रहेको बताए। ‘हामी भाग्यमानी रह्यौँ र आतिथ्य टिकट प्राप्त गर्न सफल भयौँ। मैले यसअघि कहिल्यै विश्वकप प्रत्यक्ष हेरेको थिइनँ, त्यसैले परिवारलाई साथमा ल्याउन पाउनु निकै विशेष अनुभव हो,’ उनले भने।
उनले थपे, ‘आज मेक्सिकोले जितोस्, धेरै गोल गरोस् र राम्रो सुरुवात गरोस् भन्ने चाहना छ। त्यसपछि हामी कति टाढासम्म पुग्न सक्छौँ, हेर्दै जाऔँला।’
८२ हजार दर्शक क्षमता भएको अज्टेका रंगशालाको वरिपरि कडा सुरक्षा व्यवस्था गरिएको थियो। यद्यपि प्रहरी र प्रदर्शनकारीबीच भएको झडपका कारण केही समय नजिकका मेट्रो स्टेशनहरू बन्द गर्नुपरेको थियो।
मेक्सिकी अधिकारीहरूका अनुसार करिब ८०० प्रदर्शनकारीमध्ये झण्डै २०० जना मुख ढाकेका व्यक्तिहरू समूहबाट अलग भई सुरक्षाकर्मीहरूसँग भिडेका थिए। प्रहरीले अवस्था नियन्त्रणमा ल्याएको जनाएको छ।
यसैबीच, मेक्सिकोको लागुऔषध युद्धका क्रममा बेपत्ता भएका व्यक्तिका परिवार र शिक्षकहरूले पनि विभिन्न प्रदर्शन गर्दै आफ्नो माग विश्वसामु राख्ने प्रयास गरेका थिए।
मेक्सिकोले संयुक्त राज्य अमेरिका र क्यानडासँग मिलेर सन् २०२६ को विश्वकप आयोजना गरिरहेको छ। ती दुई देशले पनि शुक्रबार आफ्ना छुट्टाछुट्टै उद्घाटन समारोह आयोजना गरेका छन्।
खेलअघि रंगशालामा उपस्थित दर्शकहरूले शकिरा, कोलम्बियाली गायक जे बाल्भिन, अफ्रोबिट्स स्टार बर्ना ब्वाय तथा ल्याटिन संगीतका चर्चित कलाकार ड्यानी ओसियनको प्रस्तुति अवलोकन गरेका थिए।
मेक्सिकी पपरक ब्यान्ड मानाका गायक तथा गीतकार फेर ओल्भेराले पनि प्रसिद्ध गीत ओये मी आमोर प्रस्तुत गरेका थिए। उद्घाटन समारोहमा एक कलाकारले ‘मेक्सिकोमा स्वागत छ। मेक्सिको तपाईंहरूलाई स्वागत गर्दछ,’ भन्दै प्रतियोगिताको औपचारिक सुरुवात घोषणा गरेका थिए।
उनले भने, ‘हामी विविधता, सम्पदा र गौरवले भरिएको राष्ट्र हौँ। फुटबलले पनि यही धड्कन बोकेको छ, जसले पुस्तौँलाई एकताबद्ध बनाउँछ।’
समारोहमा केही कलाकारहरू आदिवासी परम्परागत पोसाकमा सजिएका थिए भने अरूले सुनौलो पहिरन लगाएर विशाल सुनौलो फुटबल बोकेका थिए।
रंगशाला दर्शकहरूले खचाखच भरिएको थियो। धेरै समर्थकहरू मेक्सिकोको राष्ट्रिय टोलीको हरियो,सेतो,रातो रंगको पोसाकमा सजिएका थिए भने अन्यले पनि आफ्ना आकर्षक र रंगीन पहिरनमार्फत उत्सवमय वातावरण सिर्जना गरेका थिए।
विश्वकप उद्घाटन समारोहमा विश्वप्रसिद्ध ओपेरा गायक एन्ड्रिया बोचेली र के–पप गायिका एजेईले प्रतियोगिताको आधिकारिक गान ‘डीएनए’ प्रस्तुत गरेका थिए। उक्त गीत बुधबार मात्र औपचारिक रूपमा सार्वजनिक गरिएको थियो।
मेक्सिकी चर्चित गायक अलेजान्द्रो फर्नान्डेजले आफ्नो देशको राष्ट्रिय गान प्रस्तुत गरेका थिए। उनी मेक्सिकोका प्रसिद्ध गायक भिसेन्टे फर्नान्डेजका छोरा हुन्। उनले गाएको राष्ट्रिय गानमा रंगशालामा उपस्थित करिब ८० हजार दर्शकले पनि स्वर मिलाएका थिए।
ग्रामी पुरस्कार विजेता दक्षिण अफ्रिकी गायिका टायलाले दक्षिण अफ्रिकाको राष्ट्रिय गान प्रस्तुत गरिन्।
