हिमाल प्रेस 
काठमाडौँ- अमेरिका र इरानबीच प्रस्तावित सम्झौताको अन्तिम मस्यौदामा तेहरानको परमाणु कार्यक्रम, तेल प्रतिबन्धमा राहत, हर्मुज पुनः खोल्ने र इरानको कब्जा सम्पत्ति फुकुवाजस्ता धेरै प्रमुख मुद्दाहरू समावेश गरिएको इरानी वरिष्ठ अधिकारीले जानकारी दिएका छन्।
इरान र अमेरिकाबीच सम्भावित सम्झौताको खबर बाहिर आएको छ। रिपोर्टअनुसार इरानका एक वरिष्ठ अधिकारीले दुई देशबीच एक मस्यौदा सम्झौता तयार गरिएको छ, जसमा तेल प्रतिबन्ध, परमाणु कार्यक्रम र आर्थिक राहतजस्ता धेरै महत्वपूर्ण मुद्दा समावेश गरिएको छ। यो मस्यौदा तयार भई सहमति भएमा आगामी ६० दिन युद्धविराम अवधि लम्बिनेछ भने यो समयमा युद्ध अन्त्यका लागि अन्तिम सम्झौता हुनेछ।
यो प्रस्तावित सम्झौता अन्तर्गत सबैभन्दा ठूलो कदम भनेको इरानले ‘स्ट्रेट अफ हर्मुज’लाई तत्काल सबै व्यापारिक जहाजका लागि खुला गर्नेछ।
त्यसको बदलामा अमेरिकाले इरानको बन्दरगाहमा लगाएको नौसैनिक नाकाबन्दी फुकुवा गर्नेछ। सम्झौतामा हस्ताक्षर हुनासाथ यो प्रक्रिया सुरु हुनेछ उक्त प्रक्रिया आगामी ३० दिनभित्र सम्पन्न हुनेछ। यो मार्ग विश्वव्यापी तेल आपूर्तिका लागि निकै महत्वपूर्ण मानिन्छ, त्यसैले यो खुल्नु अन्तर्राष्ट्रिय बजारका लागि ठूलो राहत हुनसक्छ।
आर्थिक मोर्चामा, अमेरिकाले अन्तिम सहमति नभएसम्म इरानमाथि कुनै नयाँ प्रतिबन्ध लगाउने छैन। अन्तिम सम्झौतापछि अमेरिका र संयुक्त राष्ट्रसंघका सबै नाकाबन्दी तोकिएको समयसीमाअनुसार फुकुवा हुनेछन्। अमेरिकाले इरानलाई निश्चित अवधिका लागि तेल बेच्न र त्यसबाट प्राप्त हुने आम्दानी प्राप्त गर्न अनुमति दिन तेल प्रतिबन्धहरू पनि खुकुलो बनाउनेछ।
मस्यौदामा अमेरिकाले इरानको जफत गरिएको २५ अर्ब डलर बराबरको सम्पत्ति पनि सार्वजनिक गर्ने प्रस्ताव गरिएको छ। यो रकम प्रत्यक्ष नगद स्थानान्तरण, क्षेत्रीय देशहरूसँग सहयोग र वित्तीय ‘क्रेडिट लाइन’हरू मार्फत उपलब्ध गराउन सकिन्छ। यसका साथै अमेरिकाले इरानको पुनर्निर्माण र विकासका लागि योजना तयार गर्न आफ्ना क्षेत्रीय सहयोगीहरूसँग काम गर्नेछ, जुन तेहरानसँगको वार्ताबाट ६० दिनभित्र हुनेछ।
आणविक मामिलामा इरान परमाणु हतियार निर्माण वा अधिग्रहण नगर्ने कुरामा सहमत हुनेछ। अन्तिम सम्झौता नभएसम्म, इरानले आफ्नो परमाणु कार्यक्रमको वर्तमान स्थितिलाई कायम राख्नेछ र युरेनियम संवर्धन वा आणविक सुविधाहरूको विस्तारलाई अघि बढाउने छैन। मस्यौदाद्वारा निर्दिष्ट आगामी बृहत् सम्झौताअन्तर्गत अमेरिकाले इरानलाई आफ्नो उच्च संवर्धित युरेनियमको भण्डारलाई इरानी भूमिमा कम संवर्धित स्तरमा रूपान्तरण गर्न अनुमति दिनेछ।
सम्झौतापछि ६० दिनभित्र इरानको आणविक कार्यक्रम, युरेनियम संवद्र्धन गतिविधि र अत्यधिक संवर्धित युरेनियमको भण्डारको व्यवस्थापनसँग सम्बन्धित मुद्दाहरूमा वार्ता हुनेछ र यसलाई अन्तिम सम्झौतामा समावेश गरिनेछ।–रासस
